[A:118] mdzad pa'i rnam thar zur tsam bsdus pa 'di/ /bdag blo dman pas bkod par mi nus kyang / /dad ldan skyes bu bstan pa'i rgyus 'dod rnams/ /mos gus gdung ba dpag med skye ba dang / /rna ba'i dga' ston 'gyed phyir bdag gis bri/ /
zhes brjod de/ de'ang 'jig rten gyi khams 'dir dge legs dang phan bde thams cad 'byung ba'i gzhi sangs rgyas kyi bstan pa rin po che yin la/ de dar zhing rgyas par byed pa'i rkyen/ rgya bod kyi chos rgyal byang chub sems dpa' rnams kyi sku drin yin pas/ de rnams kyi lo rgyus rgyas par bya zhing / khyad par du'ang mtha' 'khob kha ba can gyi ljongs 'dir ston pa yang dag par rdzogs pa'i sangs rgyas des lung bstan pa bzhin/ byang chub sems dpa' 'phags pa spyan ras gzigs dbang phyug des/ gang la gang 'dul gyi sprul pas sems can thams cad thar pa byang chub kyi lam la 'god par mdzad cing / khyad par 'phags pa de'i thugs kyi sprul pa chos skyong ba'i rgyal po srong btsan sgam po la sogs pa/ chos rgyal mes dbon rim par byon pa rnams kyis sangs rgyas kyi bstan pa dar zhing rgyas par mdzad pa'i rnam thar mdor bsdus pa zhig bshad na/ yid ches shing the tshom sel ba la/ chos 'byung gi lo rgyus 'di thugs la bzhag 'tshal/ /
dang po/ bskal pa ji ltar chags pa nas/ rgya gar gyi chos rgyal rim pa byon pa dang / ston pa shAkya thub pa 'jig rten du byon nas dam pa'i chos dar ba'i skor/ de'ang dang po/ phyi snod kyi 'jig rten gyi khams 'di nam mkha' stong pa mtha' las 'das pa zhig yod pa las/ phyogs bcu nas rlung g.yos te/ phan