[A:48]/ /dus 'khor bla ma brgyud pa'i rnam thar bzhugs so/ /
/ /shrI kA la tsakra na maH bla ma dpal ldan dus 'khor la/ /sgo gsum gus pas phyag btsal te/ /dus 'khor bla ma brgyud pa yi/ /rnam par thar pa brjod par bya/ /de la rnam pa drug yin te/ /ston pas dus 'khor gsungs pa'i tshul/ /sdus pa po yis bsdus pa'i tshul// de yi bstan pa gnas pa'i tshul/ /chos rgyal rim par brgyud pa'i tshul/ /'phags pa'i yul du dar ba'i tshul/ kha ba can du 'phel ba'i tshul/ /lam gyi rnam gzhag bshad tshul rnams/ / so sor nges par bya ba'o/ /dang po ni/ zhing gi gnas tshul sngon du 'gro ste/ 'dzam gling chung ngu 'di'i lho nas byang du 'phags pa'i yul dang / bod dang / li dang / rgya nag dang / shaM bha la dang / gangs ldan rnams rim pa bzhin du gnas so/ /de la shaM bha la'i yul de yang rgyar dpag tshad sum stong yod pa gangs ri'i mu khyud kyis bskor zhing / chus bcad pa'i sa padma 'dab brgyad kyi rnam par gnas pa/ de'i dbus na dpag tshad stong phrag gcig pa'i lte ba zlum zhing mtho ba ke la shar grags pa/ de'i dbus na kA la pa zhes bya ba'i pho brang zheng dpag tshad bcu gnyis pa grong khyer bye bas nye bar bskor ba/ pho brang de'i lho phyogs na ma la ya'i skyed mos tshal/ tshal de'i shar na nye ba'i yid kyi mtsho/ nub na padma dkar po'i mtsho/ de gsum ga dpag tshad bcu