[A:༡༩ན]Carving Colophon, f. 19a1-7
།༄༅། །སྭསྟི༏
གང་ཡང་བསམ་འཕེལ་དབང་གི་རྒྱལ་པོ་དཔལ་ལྡན་དུས་ཀྱི་འཁོར་ལོ་ནི།
།འཕགས་ཡུལ་གསུང་རབ་ཆུ་གཏེར་ཆེར་གནས་པཎ་གྲུབ་ཀླུ་དབང་གཙུག་ན་མཛེས།
།བློ་གྲོས་ཡངས་པའི་གྲུ་རྫིངས་ལ་བརྟེན་སྒྱུར་བྱེད་དེད་དཔོན་མཆོག་རྣམས་ཀྱིས།
།ལེགས་བླངས་འགྲོ་འདི་སྐལ་པ་བཟང་མཛད་སྐུ་བཞིའི་གནས་རེག་འདོད་དགུ་བསྩལ།
།དེ་ལྟ་ན་ཡང་ཚོགས་བཤད་མཆིང་བུ་ལ།
།རིང་དུ་འདྲིས་པ་རྟོག་གེའི་མཁས་པ་ཡིས།
།ཁ་བརྩེའི་གནས་སུ་དཀྲི་བའི་ཕོ་ཉ་བཞིན།
།འདི་ནི་སྐྱེད་རྡོའི་འོས་ཤེས་ཀུན་ཏུ་བསྒྲགས།
།ཐ་སྙད་གཞུང་ལུགས་ཆ་ཀླུང་མང་བརྒལ་བས།
།སྙེམས་པ་ཐོབ་ནས་སྤོབས་པའི་ཚོད་དཔོག་གིས།
།འདི་ནི་གྱ་གྱུར་མི་འགྲོ་ཆུ་མིན་ཞེས།
།སེམས་འགྲེལ་རྒྱ་མཚོ་ཆེ་ལ་འཕྱ་བ་མཚར།
།སླད་དུ་པད་དཀར་ཐུགས་རྗེའི་རང་གཟུགས་ནི།
།མཁས་པ་ཀུན་གྱི་རལ་པའི་རི་བོ་ལ།
།ཞབས་སེལ་ཟླ་ཚེས་གསར་པ་འགོད་མཁས་པ།
།ཆོས་ཀུན་དེ་ཉིད་གཟིགས་པ་གང་དེ་ཡིས།
།ཐུགས་རྗེ་ཆེར་འཕེལ་ངན་འགྲོ་ལས་སྐྱོབ་ཕྱིར།
།གང་ཞིག་དད་པའི་མཆོད་སྡོང་རྩེར་མཆོད་ན།
།དངོས་གྲུབ་ཡིད་བཞིན་མྱུར་སྩོལ་འདི་ཉིད་ཅེས།
།ལོག་རྟོག་སེལ་བྱེད་ལེགས་བཤད་གཏམ་གྱི་ཕུལ།
།འཆི་མེད་མ་ལླིའི་དོག་པས་མཚོན་མིན་ཞིང།
།ལྷོ་ཕྱོགས་རླུང་གི་ཁེངས་པའང་འཕྲོག་བྱེད་པ།
།ཨེ་མ་སྙིང་གི་གདུང་སེལ་བདུད་རྩི་མཆོག
།སྐལ་བཟང་རྣ་བའི་བཅུད་ལེན་སྦྱིན་པ་མཛད།
།ཕྱི་ནས་རིན་ཆེན་ཆོས་ཀྱི་རྒྱལ་པོ་ཡིས།
།ཕྱོགས་ཀྱི་རྣ་ལུང་བརྒྱན་ཕྱིར་འཕྲུལ་ཆེན་རྒྱའི།
།བསྐྱེད་ཚལ་ལས་འོངས་ཡི་གེའི་ཨུ་ཊྤལ་ཕྲེང།
།ཀུན་ལ་ཆར་བཞིན་འབབ་པ་འདི་བསྒྲུབས་སོ།
།གང་འདིའི་ལེགས་བྱས་ཉི་འོད་གསར་པ་ཡིས།
།རྣམ་རྒྱས་དུས་འཁོར་གསེར་གྱི་པདྨོའོ་རོས།
།འགྲོ་མང་བུད་པ་ཚིམ་པའི་རྩེ་དགའ་ཅན།
།ཐུབ་བསྟན་དབྱིད་ཀྱི་དཔལ་མོ་རྒྱས་གྱུར་ཅིག
།ཡི་གེར་འགོད་མཁས་ལྷ་རྡོར་དང།
།བརྐོས་བྱེད་དར་པོ་དཔོན་སློབ་དང།
།སྦྱིན་དབང་དཔལ་འབྱོར་ཕུན་ཚོགས་རྣམས།
།དང་པོའི་སངས་རྒྱས་ཐོབ་གྱུར་ཅིག། ༎ །