[A:233]bral thugs rje'i ngang gdangs can/ /'bangs srid rgyu skar ltar bkra'i dbus na mtho/ /de yi sbyin pa'i sgo 'phar yangs po ni/ /slong ba rnams kyi rang 'dod bzhin du gdangs/ /gang gi bka' ni skye dgu'i rna ba la/ /lha yi rnga chen lta bur rtag tu snyan/ /de yi dad dang lhag bsam 'byor pa'i dpal/ /rnam thos bu yi longs spyod lta bu la/ /snying po len slad chos kyi sbyin pa'i char/ /spel byed spar gyi chu 'dzin 'di bsgrubs so/ /yi ge'i byed po don yod dpal bzang ste/ /rkos la 'gran bral dpon grags dbon tshes sogs/ /dag byed me tri A nanta dang ni/ /rig 'dzin grags pa'i rnam dpyod mthu yis so//
'dir 'bad dge tshogs 'od dkar phung po nam mkha'i pha mthar 'char ba des ni thub bstan kun da'i 'dzum mdangs rab rgyas shing / /mtha' yas sems can rnams kyi sdug bsngal mun pa'i phreng ba bsal te bde skyid dpal la spyod pa'i skal bzang thob pa dang / khyad par du yang gangs can ljongs 'dir bstan 'dzin rnams ni pho nu bzhin mthun sde srid skyong rnams mi mthun med par bde/ /skye dgu kun gyi gong ma ngag gi dbang phyug bkra shis grags pa'i rgyal mtshan dpal 'byor bzang po khu dbon rnams kyi ni//sku tshe ring zhing chab srid brtan la bka' yi blon chen sba snang nam mkha' lha dbang kun dga' sku mched dbon sras bcas/ /sku tshe 'dir yang 'gal rkyen kun zhi tshe dpal longs spyod 'bru nor dbang thang chab srid dbang phyug rnams ni gong du 'phel/ /rdzong gzhis la sogs mnga' ris nyid du gtogs pa'i mi nor rnams ni phyi dang nang gi bar gcod kun las rgyal zhing brtan/ /zung 'jug phyag chen gnas lugs rtogs te mthong thos dran reg rnams ni smin grol lam la 'god pa'i nus dang ldan gyur cig/ //shu bhaM ma stu sarba dza ga taM/