[A:107a]blo gros shambha la ma yin pa'i 'dzam bu gling phal cher kho'i 'og tu chug pas dpung tshogs chen po can gyis bsu/ der 'thab pas rigs ldan rgyal te kho 'khor bcas rjes su gzung / de bzhin gling lhag ma rnams su'ang g.yas skor gyis kla klo'i lugs de zhugs pas/ de dag tu byon nas 'thab mi dgos chos kyis btul/ bstan par bzhag de la lo bzhi bcu rtsa dgu 'gor/ de'i lnga bcu pa la shambha lar 'khor te sras tshangs pa de dang bcas pa'i 'dzam gling dang / lha'i dbang po gling bcu gcig la rgyal por bkod nas sprul pa bsdu'o/ /de yan la bstan pa'i dus bzhi thim la/ de'i phyi lo nas dus bzhi chung ngu rigs ldan gyi dus bzhir grags pa de 'ong / de la mi lo nyi khri chig stong drug brgya mod/ de'ang don la sangs rgyas kyi bstan pa'i dus yin kyang / dang po spyir btang 'di dmigs bsal du byas nas bzhag 'di'ang shAkya thub pa nyid kyi smon lam gyi stobs yin/ 'di'i rdzogs ldan gyi dus mi rnams kyi tshe brgya phrag bco brgyad du gnas shing / de bzhin longs spyod la sogs pa'ang rnam thos kyi bu'i 'byor pa bzhin du 'phel zhes grags la/ de skabs 'dzam bu'i gling gi sa thams cad kyang phun sum tshogs par 'gyur ba yin no/ /des na lung las sangs rgyas kyi bstan pa'i gnas tshad la stong dang / nyis stong dang / nyis stong lnga brgya dang / lnga stong gnas par bshad pa lta bu so so'i dgongs gzhi rtsad ma chod par kha dmar btags na 'gal ba'i phung por 'gyur la/ phal cher lnga stong don la gnas par 'dod pa la'ang 'dis gnod cing / de'i lnga brgya phyi ma gnyis sku gdung gi dus su bshad pa la/ dga' ba'i bzhin gyi rtogs brjod las yar 'phel ba'i mi lo drug brgya la gnas brtan chen po bcu drug 'dus nas sku gdung gi mchod rten mchod par bshad pas gnod do/ /des na bstan pa'i gnas tshad 'di nas gsungs pa ltar khas len dgos te theg pa'i khyad par gyis so/ /bstan pa'i 'das lo ding sang phan la sum stong la sogs par smra ba'ang 'dis ma dag par go nus shing / 'dir rang gi lugs la spyir btang gi bstan pa'i dus bzhi la lo grangs sum stong nyis brgya yod pa'i nyis stong bzhi brgya dang lnga bcu rtsa drug