[A:109a]khyod kyi gdul bya yod pas song zhig gsungs nas mi snang bar gyur to/ /rnal 'byor pa de phyag rdor/ dge slong de spyan ras gzigs/ ra pa tsho na re/ tsi lu pas rin chen ri bo'i gtsug lag khang du byon rgyud sde rnams gzigs pas byang chub sems dpas bkral ba'i 'grel pa zhig dgos par dgongs/ shambha lar yod par gzigs nas rgya mtshor nor bu len du 'gro ba'i tshong pa dang bsdebs nas byon/ rgya mtsho brgal nas tshong pa rnams dang zla ba drug gi dus 'dzom byas te rim gyis byon pa ri zhig gi steng du sleb pa dang / mi gcig dang phrad nas/ de na re gar 'gro zer/ shambha lar byang chub sems dpa'i chos skor tshol du 'gro byas pas/ de shin tu bgrod dka' ste/ 'di nyid du shes pa byung na nyan pas chog mod zer/ 'jam dpal gyi sprul par shes te phyag byas nas maNDYal phul/ gsol ba btab pas/ dbang rgyud 'grel man ngag thams cad stsal me tog gcig spyi bor bzhag byang chub sems dpa'i skor ma lus pa khong du chud par gyur cig ces byin gyis brlabs pas/ chu snod gcig nas gcig tu byo ba ltar byang chub sems dpa'i skor ma lus thugs su chud/ tshur log tshong pa rnams dang bsdebs rgya gar shar phyogs su byon no zhes dang / 'bro pa rnams de ni dus zhabs pa chen po klu'i byang chub kyi dngos slob sgrol mas byin gyis brlabs pa yin/ de ltar byon pa'i lhag pa'i bsam pa mkhyen te rigs ldan dpal skyong gis der phebs nas bshad zer/ gzhan du de'i tshe rgyal po zla ba'i 'od rgyal sar phebs nas lo bzhi pa yin pa'i phyir des bshad par rigs so/ /don du na 'chad pa po dang nyan pa po thams cad sprul pa'i sku sha stag yin pas so so skye bo'i 'ol tshod byas pas rtogs par dka'/ de'i phyir rnam gzhag mang / rang lugs tsi lu pas dge slong gi ngag bzhin lho phyogs kaM ka sha ra bya ba rgyal po shing rta'i 'khor lo bya ba'i blon po u na bi ta bya ba dang / bram ze di ri pa ni bya ba dang / sgra mkhan su na shrI bya ba gsum la dus kyi 'khor lo bshad pas/ sgra mkhan des bshad pa byung / bram zes sgrub pa byung / blon pos gang yang ma byung / de yan na dus kyi 'khor lo'i gzhung lugs thugs la yod/ yi ger bris pa med nas/ de nas yi ger bris/ de tsa na yul der stag gzig pa'i dmag byung