[A:121a]bu bsad pa la sdug bsngal de tsam na gzhan gyi bu bsad pa la'ang de lta bu yod mod/ ci'i phyir 'tsho ba'i phyir de dag gsod gsungs pas bden snyam/ da bu byung na mi gsod dam byas pas mi bsod zer/ der slob dpon gyis bu sos par mdzad pas dga' zhing mgu la yi rangs pa skyes nas slob dpon la btud pas rjes su bzung ba grub thob dga' ba ste/ da lta srin po'i gling na'o/ /de nas yang shrI na ga rar glu mkhan dregs pa can kho'i glu la thams cad dga' nas nyan/ yon chen po thob pa zhig yod pa dang khrom gyi dbus su kho glu len pa la sdo ba'i glu mkhan gnyis pa zhig tu mdzad de/ der kho dang 'gran pas khos ma thub ste/ lha'am/ klu'am/ su zhig snyam pa dang / slob dpon gyis sku rang bzhin du bstan pas rdzu 'phrul la dad nas rjes su 'dzin par gsol bas rjes su bzung grub pa thob/ dbyangs ldan zhes bya ba na ga ra'i grong khyer de nyid du'o/ /yang lho phyogs na rgyang 'phen gyi grub mtha' dar bas/ de'i paNDYi ta'i gtso bo dzi na zhes bya ba zhig dang sangs rgyas pa'i paNDYi ta'i gtso bo zhig las rgyu 'bras bden mi bden la rtsod pa na/ slob dpon der byon te/ gnyis po la khyed rang gnyis nga'i gos kyi grwa la zung zhig gsungs/ bzung ma thag tu sa 'og tu bslebs nas dmyal ba na zangs chen po'i nang du khro chu khol ma la sdig pa spyod pa sreg la/ gcig na zangs zhun ma bskol srog chags mi snang / mu stegs des dmyal ba'i srung ma la dris pas/ 'di na sngar sdig pa byas te shi ba rnams 'tshod pa yin/ 'di na 'dzam bu'i gling na mu stegs las rgyu 'bras la skur pa 'debs pa dag cig yod pa de dag tshe 'phos na 'dir 'tshod do zer/ shin tu skrag nas las nag po'i rgyu las 'bras bu 'byung ba ni bden pa 'di lta na/ bdag da lta gzung bar mi 'gyur grang snyam skyes pa dang / yang lha'i yul du khrid/ de na gzhan rnams lha mo dang lhan cig dga' mgur spyod la/ gcig na lha'i bu med de/ bu mo 'ba' zhig tshogs so/ /der dris pas gzhan rnams sngar las dge ba spyad nas shi 'phos pa 'dir skyes pa da lta de'i 'bras bu la spyod pa yin/ 'di na 'dzam bu'i gling na las 'bras yod par shes nas sdig pa spong ba dag shi na 'dir skyes nas bdag cag dang lhan cig rtse dga'o zer bas log nas mu stegs des slob dpon la btud pas rjes su bzung ste grub pa thob/ rnal 'byor