[A:122a]pa dzi na/ da lta'ang lho phyogs dpal gyi ri la'o/ /yang grong khyer pA Ta li pu tra skya nar gyi bu zhes bya ba na/ mu stegs byed pa mthu ldan zhes kho dang mi mthun pa thams cad mthus gsod pa zhig byung ste/ thams cad skrag nas kho mgu bar byed do/ /kho'i mdun du phyin nas tshig gis sun phyung / rang nyid lhag pa'i gtam byas pas/ kho khros nas mthus gsod pa'i dus btab bo/ /der slob dpon gyis rtsal phyung zhig byas pas/ des cher khros bsgrubs pas kho rang gi nye 'brel thams cad shi nas ngu'o/ /der slob dpon byon nas/ nga la ni so na ba tsam yang med do byas pas lhag par sdug go /der khyed kyis bsad pa rnams kyang gzhan gyi nye 'brel yin na 'di dang mi mtshungs sam/ mtshungs so/ /da nye 'brel langs te byung na phyis mthu mi byed dam/ sngar byas la 'gyod pa 'di 'dra na phyin chad byed pa'i blo lta ga la skye zer/ der de dag gsos nas bstan pas grub thob tu shes te phyag phyir 'brangs pa rnal 'byor pa nyi zla 'dzin/ da lta grong khyer a mi tsi ka li na bzhugs so/ /de nas slob dpon gyis bhangga lar byon nas dur khrod du rtswa'i spyil po bcas te bzhugs pa'i tshe/ phal cher gyis de nyid du ting nge 'dzin la bzhugs par mthong la/ gzhan du rnam smin gyi lus 'di khas 'og min gyi zhing du yang dag par rdzogs pa'i sangs rgyas rdo rje 'chang chen po rigs drug gi khyab bdag de dang bgros nas phyir 'dzam bu'i gling du log ste bskyed rim thams cad yan lag bzhi drug rdzogs rim pha rgyud rim lnga/ ma rgyud phyag rgya bzhi/ lhag par tshig gsum du bstan pa thams cad bsdus pa shin tu rmad du byung ba'i rgyud ces grags pa bsnams te dril bsgrags so/ /phyag rgya chen po mchog gi dngos grub thob/ bhangga lar/ nga la mi yi bla ma med/ /nga yi bla ma thams cad mkhyen/ /ces dang / sangs rgyas dang yang ngas gtam byas/ /zhes gsungs te thams cad skal pa ldan pas nyan te mkha' spyod grub pas yul de lan gsum du stongs par byas so/ /bar ma dang bstun nas sprul pa'i skur bstan tshul la/ grub snying gi lo rgyus las/ rnal 'byor ma tsinto zhes bya ba rang bzhin gyi rnal 'byor ma chang 'tshong pa la/ rnal 'byor pa mthing nag cig 'ongs te chang nyos/ rin ci 'dod zer/ bu 'dod byas pas/ nub der bsdad rnal 'byor ma la chags pa spyad/ tho rangs kho rang gar song med la/ shul na shing gi rdo rje zhig 'dug pa blangs