[A:124a]btang sgo drung du sleb pa dang / bdag cag dmangs mo dbang chung bas/ /blon mo'i tshogs la ma zhus par/ /bdag gi sha za khrag 'thung bas/ dam pa bdag la dgongs zer nas longs sku blon mo'i tshogs la zhur song / mar me la ni sbrang ma bzhin/ /bdag 'joms sgo ma ga la srid/ /byas nas lde mig gis sgo phye ste nang du 'tshangs pas/ der gnas pa'i mkha' 'gro rnams kyis 'jigs pa'i cha byad bstan te glags blta bas/ lus ngag yid zil gyis gnon pa'i lta stangs byas pas/ de dag gi rgyal mo chos sku ye shes kyi DA ki ma la zhus pas gnang ba thob ste dkyil 'khor chen po'i dbus su bzhugs so/ /der bcom ldan 'das ma la gus btud ma byas par 'dug pa la/ dpa' bo dpa' mo de dag gis/ /'di ni dus gsum sangs rgyas kyi/ /yum gyur bcom ldan 'das ma la/ /ma gus pa yi tshul can 'di/ /ci yi phyir na 'joms mi bya/ /zhes zer ba la/ bcom ldan 'das ma nyid kyis/ 'di ni dus gsum sangs rgyas kyi/ /yab gyur bde mchog 'khor lo ste/ /'di la mkha' nas rdo rje yi/ /ser ba phab kyang gzhom mi nus/ /gsungs/ der khyod ci la 'ongs zer/ bdag rang panytsma pA na yin/ /sring mo bde ster ma yis btang / /snyan rgyud yi ge med pa zhu/ /byas pas/ sku tsa ka li/ gsung yig 'bru/ thugs phyag rgya'i brda gsum bstan byung ba la/ tsaka li sku yi dkor mdzod nas/ /brgyud pa yid bzhin nor bu zhu/ /yig 'bru gsung gi dkor mdzod nas/ /smin lam yid bzhin nor bu zhu/ /phyag mtshan thugs kyi dkor mdzod nas/ /grol lam yid bzhin nor bu zhu/ /byas pas/ tsaka li sku yi dkor mdzod na/ /brgyud pa yid bzhin nor bu la/ /dam tshig dag gi lcags bcug pas/ /dam tshig med pas phyed mi 'gyur/ /yig 'bru gsung gi dkor mdzod na/ /smin lam yid bzhin nor bu la/ /lung bstan dag gi lcags bcug pas/ /lung ma bstan gyis phyed mi 'gyur/ /phyag mtshan thugs kyi dkor mdzod na/ /grol lam yid bzhin nor bu la/ /grub thob dag gi lcags bcug pas/ /ma thob pa yis phyed mi 'gyur/ /gsungs so/ /de la/ mkha' 'gro'i lung bstan lde mig yod gsungs pas/ mkha' 'gro rnams rta gad du bgad nas/ dmus long bltas pas gzugs mi mthong / /'on pas nyan pas sgra mi thos/ /lkugs pas smras kyang don mi go /zha bo brgyugs pas rjes mi sleb/ /