[A:130a]grong khyer phung bar 'gyur ro/ /zhes kho dang ro kha sbyar te bzhag kho rang rig sngags bzla/ nam gung tsam na ro langs/ ma zhed par bsdad pas ji ltar zer ba ltar lce phyung ngo / /de sos bcad pas ral grir song / de dge tshul gyis khyer bas kho dngangs te/ khyod sangs rgyas pa snying rje che ba ma lags sam/ de lta bur ma phrogs shig byas pas/ dge tshul na re/ ngas lha'i yul bltas la myur bar log ste khyod rang la sprad do ma 'jigs shig zer nas/ sum cu rtsa gsum du phyin/ lha dang bcas pa'i 'jig rten mthong nas phyir log ral gri mu stegs byed de rang la sprad/ ro gser gyi sbram bur song ba dge tshul gyis byas/ mu stegs de mkha' spyod du song / dge tshul gyis gling bcu gnyis ri rab dang bcas pa la dpe blangs gser des rgyu byas nas gtsug lag khang bsgrubs pa yin gsungs/ dpal gyi bsam yas de la dpe blangs pa yin no/ /der sleb pa dang dge 'dun de dag gis gang nas byon sogs drir byung ba la ji lta ba bsnyad/ thams cad kyis sngar thos pas bkur sti chen po byas so/ /de dag la phyogs 'di na rnal 'byor gyi dbang phyug tilli pa zhes bya ba yod zer bas da lta ga na bzhugs zhes dris pas/ de dag na re rnal 'byor gyi dbang phyug tilli pa zhes bya ba cha med/ sprang po tilli pa zhes bya ba zhig 'di kun na khor re 'ong gi 'dug zer/ der dge 'dun gyi chos ston 'dug pa'i dgung la bzhugs zer te/ chad pas gnang ba zhus te tshang mal du zhugs pas/ kha zas brim tshar ba tsam na/ rnal 'byor pa ras kyi ang rag tsam min pa'i gos med pa/ lus nyi lhags kyis gdungs pas sngo skya ral pa spyi bor bcings pa zhig gis nya gson po khrig ma gang khyer nas/ 'bras btsos pa'i me dmar 'dur re ba la bsregs pas/ thab ga pa rnams rub ste rdeg par brtsams pa na/ de na re/ khyed rnams mi dga' 'am zer/ dge 'dun gyi gnas su nya gson sreg byed pa la ga na dga' byas pas/ lU hi dza dza byas pas sib nam mkha' la 'phur te song bas/ thams cad kyis grub thob tu shes nas brdegs pa la bzod gsol byas so/ /der 'di su yin dris pas sprang po tilli pa zer ba de yin zer/ 'di kha tilli pa'o snyam nas de song ba'i phyi bzhin 'brangs pas gtsug lag