[A:136a]mtshan gzhan khyab 'jug bzhad pa'i dpal/ nub phyogs na shes rab 'byung gnas blo gros sbas pa/ byang phyogs na dpal nA ro pa/ dbus na kha che rin chen rdo rje dang / dznyyA na shrI mi tra/ 'di kha cher byung ba dang mi gcig go /der nA ro pa'i zhal mthong tshad ngan song du mi skye'o zhes grags nas slob ma bsam gyis mi khyab pa 'dus so/ /der kha che'i rgyal pos gur kum gyi zhing gi ljongs dang nye ba na ri bo zhig la dpal me tog mdangs 'phrog pa'i gtsug lag khang bgyis nas spyan drangs te/ de phul bla mar bzung ngo / /des yul dbus rgyal po'i khab tu glang po che shi bas thams cad mya ngan gyis non pas/ de la grong 'jug mdzad gnod pa mi 'byung ba'i sar bskyal/ nub phyogs nA ga ra'i rgyal po mu stegs can yin pas/ de mi'i mchod sbyin byed zer nas/ mi stong lcags su bcug ste mchod sbyin gyi khang par bcug pa dpal nA ro pas dgongs te/ sangs rgyas pa'i rnal 'byor pa thams cad bsdus nas rdzu 'phrul gyis der byon/ rgyal po'i sgor spungs nas 'dug ste/ rgyal po la khyod ci 'dod pa'i dngos grub ster gyi/ mi lcags su bcug pa 'di dag thon cig gal te mi 'don na khyod la gnod pa byed do byas pas/ rgyal po na re/ de 'dra ba'i snyems nus pa ci yod pa zer/ der lta stangs bzhi dang grub pa brgyad thob pa rkyang yin byas pas/ gcig gnyis ston dang zer/ der 'gug pa'i lta stangs mdzad de nags nas glang po che bkug pas 'bu sgra dang bcas te nA ro pa'i zhabs la gtugs so/ /skrod pa'i lta stangs kyis zer mdzad pas sngar sar log der rgyal po yid ches nas nged kyis bkrol na lha mi dga' ba 'ong bas khyed rang gis khrol zer/ der nA ro pas de dag gi mgo la thal lcag re brgyab pas lcags rang grol bas rgyal po 'khor bcas thams cad sangs rgyas pa la bcug pas/ mu stegs byed dag khros nas rdzu 'phrul chen po thob pa dag gis 'jig rten 'thor ba'i rlung tsam spros pas rlung lha la bka' bsgo bas rang zhi ste/ de dag kyang yid mgu nas bstan pa la zhugs pas phyogs der sangs rgyas pa 'ba' zhig tu gyur to/ /yang sgra ldan nam sgra sgrog gi rgyal po'i btsun mo padma can du gzigs nas dgug pa'i sbyor ba mdzad pas/ de nub re bzhin rgyal po'i mchan nas rgyal po mnal du song ba'i ring