[A:137a]la gar song med do/ /nang par ni mi snang ba mdzad pas ga nas 'ongs cha med par pho brang du 'ong ngo / /rgyal pos sgo srung mang po bcug dmag gis bsrungs kyang khyad ma byung nas/ rgyal pos blon po rnams la bshad pas/ thams cad bgros/ der rig pa can na re/ ri dwags kriShNa dang bung ba bzung / btsun mo'i lus la go shirSha'i byug pa gyis/ de'i rjes la phar bung ba dang ri dwags thong / tsandan gyi dri la de gnyis chags pas gar song 'ded pas rtsad chod par 'gyur ro zer/ de bzhin byas nas sang de gnyis gar yod bltas pas nags gseb kyi spyil po zhig la de gnyis 'khor zhing 'dug go /ba lang rdzi nas rnal 'byor pa 'di snga mo zhig nas 'dug der rgyal pos rnal 'byor pa de la chad pa gcod snyam 'khor dang bcas te der byon gshed ma bkye bas/ der dgyes pa rdo rje'i ting nge 'dzin la bzhugs te bzhad pa'i gad brgyangs bcu gnyis bsgrags pas nags tshal dang ri brag dag kyang de ltar dgod pas 'ur sgra ches nas bred/ rgyal pos grub thob tu shes nas bzod par gsol/ btsun mo nA ro pa ci dga' bar mdzod cig ces phul lo/ /de la sogs pa'i rdzu 'phrul mtha' yas bstan/ rdo rje theg pa la thams cad kyi rdo rje slob dpon nam/ rdo rje 'chang chen por gyur te/ rtogs pa gong du spel ba'i phyir gsang ba'i spyod pa mdzad pas chom rkun dang phrad de chu gri zhig byin nas 'di zo zer/ snod du bcug byung ba ltem gyis bzhu nas gsol ba dang / shAnti pa tshogs 'khor mdzad pa'i tshe/ rnal 'byor pa nag po zhig nang du 'tshangs nas khyod kyis tshogs dpon mi 'ong ngas bya yi/ nus pa ston zer/ dkyil 'khor sprul te bstan nas sku rang bzhin du mdzad pas dpal nA ro par shes te tshogs dpon bcol/ sa bdun gyi bar bsgrubs nas b.ratal zhugs kyi spyod pa la zhugs te dag pa'i sa gsum mngon du mdzad/ de nas mar pas phyag phyi bgyis te puShpa ha rir dngos grub chen po'i nye rgyur phyogs las rnam rgyal gyi spyod pa brtsams te nyi ma bdun gyis phyag rgya chen po mchog gi dngos grub thob pas sku ma spangs par mkha' spyod chen por byon pa mtshan me ma mur pa zhes su'ang grags pa yin no/ /de la rang gi lcam dang / slob ma mchog thob pa'i paN chen brgya rtsa brgyad/ de'i nang nas mchog gyur brgyad/ shAnti bha dra/ shAnti pa/ mai tri pa/ Dombi pa/