[A:144a]mgon po'am/ 'bar ba'i gtso bor grags pa de tshe 'phos nas ring zhig na yul dbus kyi grong khyer gra byi lar bram ze'i rigs su 'khrungs/ mtshan dharma/ skyes stobs kyis shes rab che bas mu stegs kyi sgra khang du zhugs nas pA Ni ni byA ka ra Na/ de nas lo dgu'i ring la mu stegs byed kyi grub mtha' ma lus pa bslabs/ de dag gi nang du mkhas pas bsnyengs pa che/ mtshan dbyug gu gsum par btags/ khong gi a ne nA ro pa'i phyag rgyar yod pas/ de na re/ mu stegs kyi chos la tshe 'di'am mtho ris grub pa'i nus pa yod kyang 'khor ba las mi 'phags pas sangs rgyas mi 'byung / de bas dpal nA ro pa la chos nyon cig zer ba la/ de dang rtsod nas su pham pa des 'dud par rigs zer/ der khrid de nA ro pa dang bstan pa rgyal du btsugs nas rtsod pas nA ro pa rgyal te/ mu stegs kyi rtags bskyur rab tu byung / dharma bo dhi zhes btags/ bde dgyes la sogs pa'i dbang bskur/ gsang mtshan badzwa rA ga'o/ /mtshan nyid dang rgyud sde du ma bslabs/ da khyod phyag rgya ma gcig bsten la nags khrod du sgoms shig gsungs pas bdag mu dra'ang mi 'tshal/ nags khrod du mi sgom/ thos pa phul du byung ba zhig bgyid par zhu byas pas/ ratna A ka ra shAnti pa'i slob dpon tri ta tsinta ma Ni la sbyar/ der sems tsam lo gcig gsan/ de nas ka pi ka'i yul du shAnti pa mjal bsnyen par rdzogs/ mtshan mai tri gupta zhes btags te sde snod gsum sbyangs/ der mai tri pas rab tu mi gnas pa bzung / shAnti pas rnam rdzun pa bzung ste 'bel gtam byas pas/ mai tri pa rig pa bzang nas slob dpon khros chos gos bshus nas sgor bton/ sngo rtswa na phyag dar khrod pa'i gos dum cig 'dug pa blangs te gnas de dang mi ring ba na sgrol ma mngon par dga' ba'i lha khang du sgrol ma la gsol ba 'debs kyin zhag bdun bsdad pas/ tho rangs rmi lam du bu mo mdzes ma lo bcu drug tsam lon pa zhig byung nas/ a wa dhU tI pa khyod 'dir ma 'dug par shar phyogs su 'gron bu zad pa'i gtsug lag khang na spyan ras gzigs bzhugs kyi/ des lung ston par 'gyur ro gsungs nas mi snang / mnal sad nas rim gyis kha sarpa Nir byon nas thugs rje chen po la gsol ba 'debs kyin bsdad pas/ lo gcig lon pa'i