[A:148a]la'ang dri bar mi bya'o zhes gsungs/ mtshan gnyis med rdo rjer thogs nas yul dbus su phebs so/ /de'i tshe thams cad kyis mai tri pas sha ba ri mjal lo zer nas grags pa chen po byung / ma dad pa rnams kyis sha ba ri dang ma mjal bdud kyis byin gyis brlabs so zhes bsgrags/ de'i tshe mu stegs kyi ston pa ma trang se na zhes bya ba mu stegs kyi rigs pa smra ba/ 'khor nyis stong dang bcas pa zhig na re/ kho sha ba ri dang mjal na ngas mi thub/ ma mjal na khos nga mi thub pas rtsod pas shes so zer/ rgyal po sa mun dzas rtsod pa'i ra bar khri bshams/ shAnti pa la sogs pa'i nang pa dang phyi rol pa rang gi tshar bcad kyi dpang po bkod/ rgyal pos lam thams cad chag chag btab/ shing rta'i steng du spyan drangs nas su rgyal ba'i rjes su pham po 'jug par byas nas/ mai tri pas snga rgol byas/ khos phyi rgol byas/ lta ba rab tu mi gnas pa/ sgom pa yid la mi byed pa la sogs pa'i dam bca' mdzad de rigs pa bkod/ lung gis rgyab skyor bstan pas/ khos ma thub nas mai tri pa chen po rgyal bas rgyal ba zhes grags/ kho 'khor bcas rab tu byung / de nas slob dpon shAnti pas de la skyon bris te rdo rje gdan gyi dus mchod kyi tshe sgo'i ya lcibs la sbyar ro/ /de mai tri pas ma gzigs/ de nyin mi rnams na re/ shAnti pa la mai tri pas rtsod ma nus zer/ sang mai tri pas shAnti pa la kha sang yi ge ngas ma mthong ba yin/ de ring cis kyang 'byon par zhu byas pas shAnti pa ma byon/ bang chen lan bcu gsum gyi bar bstud de btang bas kyang ma byon par bros/ de phan dus mchod kyi bdag po khong gi mdzad pa la/ de nas rgyal pos mai tri pa la phul bas mtshan mnga' bdag ces te/ thams cad du mnga' bdag rgyal ba mai tri pa zhes grags so/ /de dus dge 'dun gyi sde o tantra pu ri/ shrI nA lendra/ rdo rje gdan/ bi kra ma la shI la bzhi mchog yin/ phyi ma'i 'byung ba'i gtsug lag khang zhes bya bar bzhugs/ 'chad nyan mdzad/ bstan bcos du ma sbyar/ de nas ring po zhig na dam tshig gi rdzas la chang nyos pas/ dpal mar me mdzad dge bskos yin pas gzigs te/ sde nyams kyi dogs nas rgyal po la 'phrin brdzangs/ rgyal pos pho nya brtag tu bcug pas 'dug par mthong ste gsol bas/ rgyal pos paNDYi ta rnams sbran nas/