[A:154a]lam mtshon par byas te tshegs med par dza gad ngha rar phebs/ de'i tho rangs tu ruShka'i dmag gis ma ga dhar slebs te bcom par 'dug gnas der rig pa 'dzin pa'i lha mo bzhis bsod snyoms phul/ der tho rangs lha'i rnga bo che'i sgra gsan pa'i rkyen gyis dga' ldan gzigs/ byams pa la chos bzhi gsan/ rang lo bdun cu rtsa brgyad la bod du phebs/ lo bcu bzhugs 'phrin las bsam gyis mi khyab pa byung / gser byung ba thams cad lo tsA ba byams pa bzheng pa'i rgyu la gnang / slar kha cher byon te lo bcu gnyis bzhugs te bstan pa bskyangs so// // ! mi tra dzo ki ni rgya gar shar phyogs ra Da'i yul du 'khrungs/ tilli pa'i dngos slob rol pa'i rdo rjes rjes su bzung / kha sarpa Nar lo bcu gnyis bsgoms pas spyan ras gzigs 'khor dang bcas pa mngon sum du byon nas chos bstan pas grub pa brnyes/ mtshan a dzi ta mi tra gupta zhes bya/ gang 'dod thams cad shing gtan las 'byung ba dang / o tantra pu ri na dge 'dun stong phrag bcu gnyis gnas pa na/ nang ma mthun pa gcig gi phyogs bud shing rgyal pos byas te dmag drangs pa 'khor lo 'phangs skrag ste bros/ dge 'dun la gnod pa med par mdzad pa/ rgyal po shing rta mkhan gyi ring la wA rA Na sI'i dpung tshogs rdul gyis nyi ma 'grib pa lta bus ma ga dha'i sangs rgyas kyi bstan pa gzhom par rtsom pa/ sku gcer bur gad rgyangs bsgrags pas sa g.yos shing mi phyugs thams cad rengs par mdzad pas rgyal pos btud pas rengs pa bkrol/ rgyal po grags pa can sde bzhi dbang du btsugs/ shing gtan bsgul nus na phar gser srang stong yang ster zhing mu stegs la 'jug bsgul ma nus na tshur 'jug par byas te shing gtan sa la bor bas bsgul ma nus pa thams cad sangs rgyas pa la btsud/ rgyal po u pa Da zhes pas mi gtsang ba'i dong bur bcug kyang tshong 'dus su byon pa dang / shing bsags de'i steng du bzhag ste zhag gsum du me spar yang sku ma tshig pas 'gyod de zhabs la 'dud pa dang / wA rA Na sI'i rgyal po la chos bshad pa na nam mkha' nas me tog gi char dang / lha'i bus bdud rtsi 'dren pa'i snang ba bstan/ rgyal po la sprin gyi dbus na bzhugs pa dang lan cig mi snang la/ zhag bdun gsol ba btab pas rdzing bu'i steng du bzhugs pa/ rgyal pos grong khyer 'bum phrag bcu cha rkyen du phul ba lo