[A:165a]te/ rtsen min pa ril gsod zer/ rgyal po thugs ma bde/ ye shes dbang po 'bod du btang bas lan gnyis su ma khugs/ gsum pa la ma khugs na sod cig bsgo bas khugs/ rgyal po la mkhan po'i zhal chems gsos btab nas rgya gar nas ka ma la shI la spyan drangs/ btsan po dgung la bzhugs/ ha shang g.yas gral/ slob dpon g.yon gral du bkod de/ btsan pos gnyis ka'i lag tu me tog gi 'phreng ba gtad de/ khyed gnyis gang rgyal ba la pham pas me tog gi 'phreng ba phul cig pham pa de 'dir ma sdod ces bka' stsal/ rtsod pas slob dpon rgyal/ ha shang gis me tog gi 'phreng ba phul te/ rgyal pos deng phyin chad lta ba klu sgrub kyi lugs gzung / spyod pa chos spyod bcu dang pha rol tu phyin pa la slobs/ ston mun gyi lugs byed du mi dbang ngo zhes bcad de/ ha shang rgya yul du brdzangs/ de'i dpe rnams gter du sbas/ ka ma la shI las 'grel pa du ma brtsams/ mi ring bar ha shang gis mngags pa'i rgya'i gshan pa mi bzhis dku mnyes te grongs so/ /btsan po'ang dgung lo drug cu rtsa dgu la gshegs so/ /de'i sras mu ne btsan pos rgyal sa gzung / bsam yas su mchod pa bzhi btsugs te/ bod kyi ltogs phyug lan gsum bsnyams/ chab srid lo gcig dang zla ba bdun mdzad/ yum gyis dug btang ste grongs/ de nas sad na legs mjing yon nam/ khri lde btsan lo bzhi pa la rgyal sa gtad/ des dkar chung rgyal sde'i lha khang bzhengs/ chos kyi srol cher bzung / rgyal srid lo bcu bdun bskyangs/ de nas khri ral pa can zhes bya ba snying rje padma dkar po'i mdo las gsal bar lung bstan pa/ mtshan ni khri lde srong btsan/ phyag na rdo rje'i sprul pa'i sku des rgyal sa bzung / 'di sad na legs kyi sras su 'chad mkhan mang zhing / glang dar ma'ang 'di'i mched do/ /sgra sbyor bam gnyis pa las/ 'di khri srong lde btsan rang gi sras su 'chad de/ 'di skad du rta'i lo la btsan po khri lde srong btsan pho brang gi 'on ljang ngo na bzhugs/ stod smad kyi dmag dang rkun chen btul/ gar log gi pho nyas phyag 'tshal/ blon chen po zhang khri zur ram shags dang / blon mang rje lha lod la sogs pas bya las gnangs mang po bcad de/ rnga rta dang ba mar phal mo che phyag tu phul/ zhang blon man chad so sor byas/ dga' stsal