[A:182a]nged mtha' 'khob kyi sems can ma rig pa rnams kyi snying stobs de 'dra na/ khyod 'gro ba'i skyabs gnas thugs rje can rnams ci tsug song zhes zhus shig da res nga dga' ba dang / phyis 'dul ba 'dzin pa dga' bar yang byed do/ /da 'di na gser srang bdun brgya yod/ 'di phar khyer la bdun brgya po 'di bla ma'i phyag tu phul/ nged bod pre ta pu ri lta bu'i grong khyer na gser lug shig tsam re la'ang dka' las chen po yod pa yin pa la/ da 'di dang lha bla ma ye shes 'od kyis dbu bgyis/ mi nor thams cad yongs su rdzogs nas yod kyi/ da lan 'di la mgon po bod du ma byon na khyod dam pa rnams kyi thugs rje'ang de ltar bas pas nged kyang bya ba ci bder spyod par bgyi'o/ /khyod 'dul ba 'dzin pas zhu ba 'di rnams jo bo la zhus nas 'byon du ma bzhed pa'i gzhug mtha' ma la snyan du thegs par gyis shig gsungs nas spyan chab kyis pang khebs dang cog rtse bangs pa tsam du bshum zhing gsung byon pas/ dge bshes gung thang pas tshig zur tsam yang zhu ma nus/ gsung shin tu bden pa de rnams thos/ chos rgyal de ma mthong yang rnam pa dran pa dang / khong khu dbon gyi mi nor mang po zad pa rgyus yod pas/ khong khu dbon sdug ches/ nged rnams skyid ches pa dang / lha btsun mi chen po zhig gis de ltar bshums pa'i stobs kyis lo tsA ba lus 'dar/ mchi mas gdong gang ste lha btsun gyi zhal yang lta mi nus/ de'i stobs kyis lus srog dang / bar gyi dka' tshegs dang / tshe 'di'i bde skyid gang la'ang ma bsam par 'o lags so zhes dbang med par zhal gyis bzhes so/ /de nas lha btsun gyis 'khor lnga brgya tsam gtong ba'i grabs mdzad pas/ lo tsA bas de tsam mang lnga tsam gyis chog phar lam tshur lam gyi rgyags dang bcas pa gser du dgos zhus pas/ paNDYi ta la gser thig po gcig la srang bcu drug yod pa/ ling ba gcig la srang bdun cu/ gser phye bre gang / lo tsA ba la srang bdun/ phar lam gyi brgyags la srang bdun sogs dgos pa thams cad brdzangs te/ lha btsun pas thag ring por skyel thung mdzad/ dge slong khyod kyis nga'i phyogs su bya ba byas da lan dka' las che na'ang phar byon la don grub pa zhig mdzod/ 'khor nas byas shes bka' drin gzo bar bya zhes lo tsA ba dpon slob la phyi mig gzigs kyin gshegs/ yang gsung