[A:189a]bu bzhir grags/ rgyas lcags ri gong kha btab/ sne'u zur pa mtshan ye shes 'bar/ gzhon nu nas ting nge 'dzin rang 'khrungs/ de'i gtam sgom pa shes rab dbang phyug gis dgon pa ba la zhus pas/ kho'i de dge ba'i bshes gnyen gyis zin na legs par 'ong ste ma zin na smyon par 'gro gsung ba des bskyar bas de res la ma thon/ phyis ra sbreng du byon/ dgon pa ba bsten/ jo bo'i gdams pa ji lta ba gnang / sne'u zur btab/ ting nge 'dzin dang rdzu 'phrul bsam gyis mi khyab/ rje btsun mi la dang mtshan thos pa'i grogs po yin/ tshogs pa stong tsam re 'dus/ slob ma 'gro don nus pa mang du byung ba'i/ sgyer sgom khu dbon/ sgyer sgom bya yul ba'i yang slob ma yin/ de'i dbon po ni rgya ma'i sangs rgyas dbon ston du grags pa byang chub sems dpa' skal ldan shing rtar singgha la'i dgra bcom pas lung bstan pa de'o/ /de'i rgya ma'i gtsug lag khang btab/ 'phrin las mtha' klas/ de'ang jo bo bod du byon nas bla chen gyi brgyud 'dzin kun kyang jo bo'i zhal slob tu song ba'i stobs kyis gnas gzhi phal cher bka' gdam ngag tu smra bas bka' gdams par grags pa der song / de dang dkar brgyud rin po che dar ba'i dus rab tu byung ba thams cad de gnyis la 'dus pa 'dra zhing / gzhan rnams nyung bas/ snar thang bcom ral thugs mug ste/ sangs rgyas bstan pa bka' phyag sprin gyis bsgribs/ /zhes gsungs so/ /gzhan jo bo'i slob ma rngog legs shes ni yar 'brog sgog mkhar du 'khrungs/ 'bring ye shes yon tan las bsnyen par rdzogs/ sde snod slob pa'i phyir du khams su bse btsun gyi rtsar byon/ 'brom yar byon pa'i phyi lo log lha sar bshad grwa btsugs/ jo bo dang mjal/ chos kyang du ma bsgyur/ de'i skabs jo bos gsang phu'i phyogs su phyag mdzad/ byams 'jam dbyangs rtsod pa mdzad kyi 'dug bshad grwa btsugs na shin tu legs par 'ong gsungs pa khong gis thos nas/ de gzhan la mi gsung ba zhu/ bdag gis dgon pa 'debs pa lags zhus pas gsang phur thogs/ phyis de la dgon pa btab/ rang gi gcung po chos skyabs kyi sras shig rab tu byung mtshan blo ldan shes rab tu btags/ 'dis mdo sde rgyan zhogs rgyugs gcig la zin pa yin zer/ dgung lo bcu bdun tshun khu bo rang gis sgra la sogs pa legs par bslabs/