[A:13]log par bsgrigs par mdzad pas rgyu lam gyi dbang gi chu bo ma nub/ dbang dang rjes su 'brel ba grol byed kyi lam bzhi bsgoms pas so so'i lta ba bzhi thugs la 'khrungs shing / nyams myong mtshan nyid pa skyes pas byin rlabs kyi brgyud pa ma nyams/ gang yang ting nge 'dzin du bsrel shes pas gdams ngag gi sarga ma log /de'i stobs kyis bla ma la sangs rgyas dngos kyi 'du shes skyes pas mos gus kyi bsam pa tshim par mdzad pa ste/ mdor na rnal 'byor gyi dbang phyug dpal ldan birWa pa la sprul pa'i sku ye shes kyi snang ba lha mo bco lngas snyan brgyud bzhi'i gdams pa nas brtsams te rje btsun sa skya pa yab sras rnams la ji ltar mnga' ba'i dbang gi chu bo dang / byin rlabs ma lus pa thams cad kyi rgyun bdag cag gi 'dren pa chen po 'di nyid la mnga' bas gsung ngag rin po che'i mnga' bdag chen por gyur pa yin no/ /gzhan yang rje de nyid la phyag rgya chen po yi ge med pa dang / bsam mi khyab pa la sogs pa lam skor phyi ma brgyad dang / dag pa gsum gyi khrid/ rang byin rlabs kyi dmigs pa nyi shu rtsa dgu/ sgo drug chos 'grel la sogs pa zhar byung gi chos skor kyang dpag tu med pa gsan/ gzhan yang pha rol tu phyin pa'i skor la/ dbu sems kyi sems bskyed/ blo sbyong don bdun ma/ zhen pa bzhi bral/ skyes tshoms dad pa'i gzhung / bslab spyod lta ba'i gzhung / sa rgyan spyod pa'i gzhung ste bka' gdams gzhung drug tu grags pa dang / mdo sil bu ba bcu bdun la sogs pa rab tu mang po gsan/ rdo rje theg pa'i skor la/ thog mar rigs