[A:29]drung gis/ bstan pa la bsams nas bshad nyan gyis gsung pa'i zhal da de dang du blangs/ bshad nyan gang nus pa byas pas sa skya pa'i bstan pa la phan par byung / nged rang 'dod pa bzhin gyis sgrub pa zhig byed rgyu byung na lus ma spangs par mkha' spyod du 'gro ba'i dbang yod pa yin te/ 'on kyang 'khor ba thog ma med pa nas lus ji snyed cig blangs pa la da lan gyi lus 'di las don che ba ma byung gsung / de nas tshes lnga/ drug bdun la sogs pa rnams la sku lus sngar dang mi 'dra ba'i byis pa lo bcu drug lon pa'i rnam pa can gyi gzhon sha chags pa/ snyan shangs mchu'i sgros rnams dkar la dmar ba'i mdangs chags shing 'od 'phro ba/ spyan yang sngar 'gres pa'i rnam pa sngo shel le ba yod pa la de dus dkar nag phyed cing yi ge shin tu phra mo'ang gzigs pa byung / sku lus kyi rnam pa de lta bur gyur cing zhal da cher mi gnang bar gtso cher ting nge 'dzin la zhugs/ skabs su res nam mkha' la spyan cer gzigs nas bzhad pa mdzad/ res 'khrul 'khor gyi rnam pa du ma mdzad/ res 'ga' sku gzugs kyis gar gyi rnam pa dang / saM kr-i ta'i skad gsung ba sogs gzigs snang dang nyams kyi ngang 'ba' zhig la 'da' bar mdzad/ de nas tshes brgyad kyi snga dro 'ja' 'od dang / me tog gi char dang / sngar tshor ma myong ba'i dri bsung khyad par can dang bcas pa ngo mtshar ba'i ltas dpag tu med pa bstan/ gdugs phyed tsam na nyi ma la cung zad bzhugs/ dgong mo gzims khang du pheb ste/ dkon mchog drung du mchod pa rgya chen po shoms gsungs nas rnal 'byor dam tshig gso ba'i cho ga mdzad/