[A:30] gsang sngags kyi rten 'brel zab mo la rtse gcig tu bzhugs pa'i ngang nas dpa' bo dang / mkha' 'gro'i tshogs kyis bsus te bde ba can du gshegs pa'i tshul bstan par gyur to/ /der sku mdangs sngar las ma g.yos pa'i stobs kyis drung na gnas pa dag gi bsam pa la da dung ting nge 'dzin las bzhengs nas zhal da gnang ba zhig 'ong ngam snyam pa las sku gshegs pa'i snang ba med pa zhig byung / de ltar tshes brgyad nas nyer lnga'i bar gzi mdangs dang ldan par bzhugs te/ nyer lnga'i nyin zhal mdangs sngon gyi tsam du gyur te/ gnam gang gi bar bzhag kyang de las gzhan pa'i rtags ma byung nas/ de'i nyin dri bzang dang / dar zab la sogs pa mchod pa'i yo byad khyad par can rnams kyis sku gdung la gus pas rim gro dang / bkur sti cher byas te gdung sgrom du spyan 'dren zhus nas mchod pa'i sprin phung bsam gyis mi khyab pa dang / bcom ldan 'das kye rdo rje la sogs pa dkyil 'khor zab mo'i sgrub mchod rgyun ma chad par zla ba bzhi'i bar du phul te gsol ba btab/ de nas sku gdung la zhugs phul ba'i tshe nam mkha' la 'ja' 'od kyi drwa ba dang / me tog gi char bsam gyis mi khyab pa babs shing / khyad par du sku gdung zhugs la phul ba'i me tshogs thams cad kyang yi ge bdun pa'i sgrar grag cing g.yon skor du 'bar ba dang / gdung khang gi thad du nam mkha' la 'ja' dkar po gdung brkyangs pa ltar byung ste/ sku gdung la me tshogs 'bar ba de srid kyi bar du gnas nas me tshogs 'bar ba thim pa dang lhan cig tu thag sgra dang bcas pas 'ja' 'od kyang bsdogs te nam mkha'i dbyings su thim par kun gyis mthun par mthong ba dang / gdung dud