[A:289]mo zhes su zhig gis rtogs par nus/ 'on kyang rags pa'i gnas 'ga' zhig brjod na/ bdag gi mkhan po kha ba can pa'i ngur smrig 'chang ba thams cad kyi gtsug gi nor bur gyur pa 'dis bde bar gshegs pa'i bstan pa'i rtsa ba so sor thar pa'i sdom pa tshigs snga phyi yang dag par bzhes pa la brten nas nges par 'byung ba'i tshul khrims kyi bslab pa rin po che spyan gyi 'bras bu ltar gces par 'dzin par mdzad de/ /dgag sgrub gnang gsum gyi bslab pa'i gzhi rnams phyin ci ma log par mkhyen nas bslab par bya ba phra zhing phra ba tshun chad kyang blang dor tshul bzhin du mdzad la/ khyad par bsnyen par rdzogs nas yun ring po'i bar du sdor dkar gdan gcig gi brtul zhugs shin tu dam pa la gnas par mdzad de skabs 'gar chos ldan gyi bya bas g.yengs nas nyi ma phyed gong du gdan bzhes ma grub na de nyin gsol ba mi bzhes pa sogs mdzad/ gzhan yang tha na chos gos zlum por bgo ba dang / kha ma bkrus par zas mi za ba dang / zos nas slar 'khrud pa dang / 'bags pa la phyag mi bya ba dang / phyag 'tshal ba'ang yan lag smad lnga sa la gtugs pa'i phyag shin tu gus par mdzad pa sogs spang blang phra mo la las sla dang khyad gsod dang ngo lkog mdzad pa lta ci smos/ bdag cag la sogs pa sku 'khor na 'dug pa'i dge sbyong ma bsdams shing bag med pa rnams la'ang lan cig ma yin par 'di bzhin byed dgos pa yin gsung legs pa'i lam kho na la nan gyis sbyong bar mdzad/ gsung las kyang / nga gzhon pa'i dus ngor dkar dang / ngang tshugs shin tu dam pas ja bzang po 'thungs pa'i rkyen byas mgo bo gas