[A:495]nas snying po'i don btsal bas/ /sbas don rlung gi zab gnad 'tshol ba la/ /gnad du che bas rtsis tshul bzhin du bslabs/ /gcig shes kun la mkhas na rtog ge pa'i/ /yun ring ngal byas rnams kyi khengs pa bstungs/ /zhes pa ltar yin zhing / de yang sdom gsum du/ /lha chen skad ngan shor ba la/ /sdug bsngal bden pa mthong zhes grags/ /zhes pa ltar/ log pa'i bshes kyi rdzun tshig dang chos ma yin pa smra ba lta bu'i 'chad nyan gyi gzugs brnyan tsam la mtha' ci bkag /drag shul can gyis zhus pa'i mdo las/ gal te byang chub sems dpa' lung nod pa'am sbyin pa dang ldan pa'am tshul khrims dang ldan pa'am bzod pa dang ldan pa'am brtson 'grus dang ldan pa'am bsam gtan dang ldan pa'am shes rab dang ldan pa'am byang chub sems dpa'i lam gyi tshogs gsog pa dang ldan pa'i tshig bzhi pa'i tshigs su bcad pa su las nyan tam lung nos sam blangs pa'i slob dpon de la des chos kyi gus par bya'o/ /ming dang tshig dang yi ge ji snyed pa de snyed kyis bskal par gal te slob dpon de la g.yo med par rnyed pa dang bkur stis rim gro byas kyang da dung slob dpon de la gus par bya ba yongs su rdzogs par bya ba ma yin na chos ma yin pas gus par byas pa lta ci smos zhes gsungs pa dang mthun par bshes gnyen de dag rnams la mnyes pa gsum gyi sgo nas gus pa lhur mdzad pa'i rnam par thar pa ni/ 'brom stod chos kyi rgyal pos bla ma se btsun dang / se ston kun rig gis rje btsun 'brog mi'i zhabs bsten pa'i