[A:307]བསྙེན་པར་རྫོགས་པའི་མཁན་པོ་མཛད། དམར་སྟོན་ཐམས་ཅད་མཁྱེན་པས་ལས་ཀྱི་སློབ་དཔོན་མཛད། འདུལ་བ་འཛིན་པ་ཆེན་པོ་ཡོན་ཏན་འོད་བཟངས་པས་གསང་སྟེ་སྟོན་པ་མཛད། གཞན་ཡང་དད་པའི་དགེ་འདུན་བཅུའི་དབུས་སུ་བསྙེན་པར་རྫོགས་པ་མཛད་ཅིང། ཚིགས་སྔ་མ་རྣམས་ཀྱང་གནས་དང་དུས་དེ་ཉིད་དུ་རྫོགས་པར་མཛད་དོ༎
མཚན་ཤཱཀྱ་རྒྱལ་མཚན་དཔལ་བཟང་པོ་བྱ་བར་གསོལ་ལོ༎
དེ་དག་ལ་འདི་སྐད་ཅེས།
བརྩེ་ཆེན་ཁྱེད་ཀྱིས་བྱང་སེམས་ཀྱི༎
སྡོམ་པ་ཐོག་མར་ལེགས་མནོས་ནས༎
དེ་ནས་ལེགས་གསུངས་འདུལ་བ་ལ༎
ཞུགས་ཤིང་རྫོགས་ལ་ཕྱག་འཚལ་ལོ༎
1.2.3
དགེ་བའི་བཤེས་གཉེན་ཇི་ལྟར་བསྟེན་པའི་ཚུལ།
གསུམ་པ་དགེ་བའི་བཤེས་གཉེན་ཇི་ལྟར་བསྟེན་པའི་ཚུལ་ནི། འདི་སྐད་ཅེས།
ཁྱེད་ཀྱིས་མཁས་ཤིང་གྲུབ་པ་ཡི༎
དགེ་བའི་བཤེས་ལ་བསྙེན་བྱས་ནས༎
རིག་པའི་གནས་རྣམས་མ་ལུས་པ༎
མངོན་སུམ་མཛད་ལ་ཕྱག་འཚལ་ལོ༎
ཅེས་བྱ་བ་འདི་ལ་དེ་ཡང། བདག་ཉིད་ཆེན་པོ་འདི་ཐོག་མར་གླིང་སྟོད་གདན་ས་བ་མཁས་བཙུན་རིན་ཆེན་རྣམ་རྒྱལ་ལ་བྱང་ཆུབ་སེམས་དཔའི་ས་དང། རྔོག་ལོ་ནས་བརྒྱུད་པའི་རྒྱལ་སྲས་འཇུག་ངོགས་ལ་སོགས་པ་རྒྱ་ཆེན་སྤྱོད་པའི་ཕྱོགས་ཀྱི་ཆོས་མང་དུ་གསན། རྐོང་སྟོན་བློ་གྲོས་དབང་ཕྱུག་པའི་དྲུང་དུ། རྔོག་ལོ་བརྒྱུད་པའི་ཕར་ཚད་བསྡུས་གསུམ་ལ་མཁས་པར་སྦྱངས་ཤིང། དབུ་མ་རང་རྒྱུད་ཀྱི་བཤད་སྲོལ་རྔོག་ལོ་ནས་བརྒྱུད་པ་མང་དུ་གསན། སྐྱོར་མོ་ལུང་གི་མཁེན་དཀའ་བཞི་པའི་དྲུང་དུ། འདུལ་བ་ལུང་བདེ་བཞི། སོ་སོར་ཐར་པ་གཉིས་དང་བཅས་པ་མདོ་རྩ་བ་རྒྱ་ཆེར་འགྲེལ་དང་བཅས་པ་བྱ་འདུལ་བ་འཛིན་པ་ཆེན་པོའི་བཤད་སྲོལ་བཞིན་དུ་གསན་ཅིང། འཕན་ཡུལ་གྲོ་སའི་མཁས་པ་ཆེན་པོ་དམར་སྟོན་གྱི་དྲུང་དུ། འདུལ་བའི་མདོ་ལུང་དང་བཅས་པའི་བཤད་པ་ཐག་མ་ཀ་ཆེན་གྱི་བཤད་སྲོལ་བཞིན་དུ་གསན་ཅིང་