[A:60]སྨད་ཀྱི་བསྟན་པའི་བདག་པོར་གྱུར་པའོ༎
གཞན་ཡང། མངའ་རིས་དང་དབུས་གཙང་མདོ་ཁམས་ན། སློབ་མ་ལ་ཆོས་འཆད་པ་ཤིན་ཏུ་མང་མོད་ཀྱང་མདོ་ཙམ་སྟེ། རང་རེས་ཀྱང་རང་ལོ་བཅུ་གཅིག་པ་ནས་བཅུ་དྲུག་པའི་བར་དང། ཡང་རང་ལོ་ཉི་ཤུ་པ་ནས་ཉེར་གསུམ་པའི་བར་དེར་རྗེ་ཉིད་ཀྱི་དགོངས་པ་ལ་མངའ་བའི་གསུང་རབ་གོང་དུ་སྨོས་པ་དེ་དག་གཉན་ཞིང་བཟུང་ནས། དུས་རེ་ཤིག་གི་བར་དུ་གློ་བ་ལ་བྱང་བར་བྱས་སོ༎
གླང་རི་ཐང་གི་སྤྱན་སྔ་བློ་གྲོས་རྒྱལ་མཚན་དཔལ་བཟང་པོས་ནི། འདུལ་བ་མདོ་རྩ་བ་ཚར་གཅིག། ཚེ་དཔག་མེད་ལྷ་དགུའི་དབང་དང། མན་ངག་གི་གནད་འགའ་ཞིག་གསན་ཞིང། རྒྱལ་ལྷ་ཁང། གླང་རི་ཐང། ན་ལེནྟྲ་གསུམ་གྱི་གདན་ས་རིམ་པར་མཛད་ནས། བསྟན་པ་དང་སེམས་ཅན་ལ་ཕན་ཐོགས་པར་མཛད་དོ༎
རྒྱལ་རོང་གི་ལྕགས་ལྷ་དབོན་པོ་ངག་དབང་གྲགས་པས་ནི། དྲུང་ཉིད་དུ་བསླབ་སྦྱངས་མཐར་ཕྱིན། ཡོན་ཏན་མཁས་པར་མཁྱེན། རྣམ་འགྲེལ་གྱི་གསུང་བགྲོས་ཟིན་བྲིས་སུ་བཏབ་པའོ༎
བྱམས་ཆེན་ཆོས་རྗེ་སྐུ་སྐྱེ་རིན་པོ་ཆེ་དང། རྟིང་ཁེམས་ཆོས་རྗེ་སྐུ་མཆེད་གསུམ་གྱིས་ཆོས་འབྲེལ་ཞུས་ནས་དད་པ་ཐོབ་པར་མཛད་དོ༎
3.2.2
གཉིས་པ་མི་ཆེན་གྱི་སློབ་མ་ནི། དགུང་ལོ་རེ་བདུན་པ་ལ། ས་སྐྱོང་མཚོ་སྐྱེས་པ་དང། ཧོར་ཤཀྱ་རྒྱལ་མཚན་ལ་འཆི་བདག་འཇོམས་པའི་དབང་མཛད་པ་ནས་བཟུང་སྟེ་ཟབ་ཆོས་རིམ་པར་གནང། དགུང་ལོ་དོན་ལྔ་པ་ལ། ་ས་སྐྱོང་ཆེན་པོ་དོན་གྲུབ་རྡོ་རྗེས། ཚེ་དབང་ཚེ་སྒྲུབ་གསན་པ་ནས་བཟུང་སྟེ་ལོ་བཅུ་གཉིས་ཀྱི་བར་དུ་གསུང་ཆོས་རིམ་པར་གནང། དགུང་ལོ་བརྒྱད་ཅུ་པ་ལ། ས་སྐྱོང་ཁྲི་ཐོག་པ་དང། སྒར་ཆེན་པ་སྐུ་མཆེད་ཀྱི་དབང་དང་གདམས་པ་མང་དུ་གསན། དེ་ནས་ལོ་བརྒྱད་ཀྱི་བར་དུ་གསུང་ཆོས་རིམ་པར་གནང་བ་ཡིན་ནོ༎
རྒྱ་མ་ཁྲི་དཔོན་ནམ་མཁའ་རྒྱལ་མཚན་པས་ནི། རོང་ཆེན་པ་ནས་བརྒྱུད་པའི་ཚེ་སྒྲུབ་གསན༎
3.3
གསུམ་པ་མཐར་ཕྱིན་པའི་མཛད་པ་ནི། དགུང་ལོ་གྱ་གཅིག་པ་ཙམ་ནས་གནས་ངེས་མེད་ཀུན་དུ་བསྐྱོད་ཅིང་