[A:61]དབེན་པ་ལ་དགྱེས་པའི་གཏམ་མང་དུ་མཛད་པ་ལ། རང་རེ་རྣམས་ཀྱིས་ཞུས་པ་ནི། སྐུ་ནས་བྱོན་པའི་སྟོབས་ཀྱིས་དགེ་འདུན་ཚོགས་པའི་གནས་འདིར་རྟག་པར་གདན་ཆགས་པ་ལེགས་ཤེས་ཞུས་པ་ན། དབེན་གནས་གང་ཤར་དུ་ལུས་སེམས་བདེ་བར་འོང། གལ་ཏེ་མི་འཚོ་བའི་མཚན་མ་བྱུང་ན་ཁྱེད་རྣམས་པ་ཐུགས་གཡེང་ལ་གཏོད་པས་བྱེས་ལམ་དུ་མ་ལུས་པར་འཁོར་འོང་ཞེས་གསུང་བ་ནི་ནར་མའི་ཞལ་ཏ་ཡིན། དེ་བཞིན་དུ་ཡོས་ལོ་ཧོར་ཟླ་བཅུ་གཅིག་པའི་ཉེར་ལྔ་ལ། ནང་སོས་མཐོང་སྨོན་དུ་སྤྱན་དྲངས། ཧོར་ཟླ་བཅུ་གཉིས་པའི་ཚེས་བརྒྱད་ཀྱི་ཉིན། ནང་སོ་ནས་གསུང་ཆོས་རིམ་པར་གནང་དགོས་པའི་གསོལ་བ་བཏབ་ཀྱང་མ་གནང་བར་དགོན་པ་ཤར་དུ་ཕེབས་བྱོན། སྙུང་བའི་རྣམ་པ་ཆེར་མེད་ཀྱང་ཕྱག་རྫས་གང་ཡོད་སྐུ་རིམ་ལ་བཏང། ་ཚེས་བཅུ་ལྔའི་ཉི་ཤར་ལ། རྡོ་རྗེ་སྐྱིལ་ཀྲུངས་དང། ཕྱག་གཡས་པ་བདུད་འདུལ་བ་དང། གཡོན་པ་མཉམ་གཞག་མཛད་ནས་དགའ་ལྡན་གྱི་གནས་སུ་བདེ་བར་སྐྱོད་དོ༎
དེའི་ཚེ་སྟོང་པ་ཉིད་རྟོགས་པའི་རྟགས་སུ་ནམ་མཁའ་གཡའ་དག། དགའ་ལྡན་གྱི་གནས་སུ་རྗེ་བཙུན་ལ་དངོས་སུ་མཇལ་བའི་རྟེན་འབྲེལ་དུ་མེ་ཏོག་གི་ཆར་ཆེན་པོ་བབ། དེ་ནས་ཞག་ཤས་སོང་བ་ནས། རྗེས་འཇུག་རྣམས་ལ། ལོངས་སྤྱོད་ཀྱི་རྟེན་འབྲེལ་དུ་ཁ་ཆར་ཆེན་པོ་ཞག་སྦྲེལ་དུ་བབ། དེ་ནས་ལོ་གཅིག་གི་བར་སྐུ་གདུང་བཞུགས་སུ་གསོལ། གདུང་མཆོད་རྒྱུན་མི་ཆད་པར་བགྱིས། སྦྲུལ་ལོ་ཧོར་ཟླ་དང་པོ་ལ་གདུང་ཞུགས་ལ་ཞེན་པའི་ཚེ། མེ་ཏོག་གི་ཆར་ཆེན་པོ་ཞག་གྲངས་དུ་མར་སྦྲེལ་ནས་བབ། ནམ་མཁའ་གཡའ་དག་པ། འཇའ་ཚོན་གྱི་ཕྲེང་བས་ཕྱོགས་ཀུན་ནས་མཛེས་པར་བཀྲིགས། རིང་སྲེལ་ཁ་དོག་སྣ་ལྔ་དང། དབུ་ཐོད་རིལ་དུ་བྱོན་ནོ༎
དེ་ནས་དགོངས་རྫོགས་ཀྱི་རིམ་པ་བསྒྲུབས་ཚུལ། ཕྱི་རྟེན་ནང་རྟེན་བཞེངས་ཚུལ། ཆོས་ཀྱི་འཁོར་ལོ་བསྐོར་ཚུལ་རྣམས་ནི་གཞན་དུ་ཤེས་པར་བྱའོ༎
ཡང་སྨྲས་པ། ལོ་བདུན་