[A:406]རིང་པོར་དབེན་པའི་གནས་རབ་ཏུ་མང་པོར། ལོའི་གྲངས་གཉིས་ཚན་དང། གསུམ་ཚན་ལ་སོགས་པའི་དུས་ཀྱིས་རྩེ་གཅིག་ཏུ་སྒྲུབ་པ་མཛད་ཅིང། སླར་ཡང་བཤད་སྒྲུབ་སྤེལ་མས་འགྲོ་བ་རབ་ཏུ་མང་པོ་སྨིན་པར་མཛད་ཅིང། བཤད་སྒྲུབ་ཀྱི་རྒྱུད་པ་འཛིན་པར་ནུས་པའི་དགེ་བའི་བཤེས་གཉེན་རབ་ཏུ་མང་པོ་དག་སྨིན་ཅིང་གྲོལ་བར་མཛད་པ་པོ་ནི། རྗེ་བཙུན་ཆོས་ཀྱི་རྗེ་ཀུན་དགའ་རྡོ་རྗེ་ཞེས་མཚན་རྣམ་པར་དཀར་བ་དེ་ཉིད་དོ༎
འདི་ཉིད་ཀྱི་རྣམ་དཀར་གྱི་ཕྲིན་ལས་དང་མཛད་པ་མདོ་ཙམ་དུ་བརྗོད་པ་ལ་གསུམ་སྟེ།
1
ཐོག་མར་མངོན་མཐོའི་གོ་འཕང་བརྙེས་ནས་བསོད་ནམས་ལྷུན་གྱིས་གྲུབ་པའི་ཚུལ། 2
ངེས་པར་ལེགས་པའི་ལམ་ལ་བསླབ་སྦྱངས་མཐར་ཕྱིན་པས་ཡེ་ཤེས་ཀྱི་ཚོགས་ཇི་ལྟར་བསྒྲུབས་པ། 3
རང་རྒྱུད་སྨིན་ཅིང་གྲོལ་ནས་གཞན་དོན་ཕྲིན་ལས་ཇི་ལྟར་མཛད་པའོ༎
1
དང་པོ་ནི།
སྔོན་ཉིད་ནས་བསོད་ནམས་དང་ཡེ་ཤེས་ཀྱི་ཚོགས་བསགས་པ་ཆེ་ཞིང། རྣམ་པར་དཀར་བའི་སྨོན་ལམ་གྱི་མཐུ་ཕྱིན་ཅི་མ་ལོག་པར་གྲུབ་པ། བྱང་ཆུབ་ཀྱི་སེམས་བསྐལ་པ་དུ་མར་སྦྱངས་པ་དང་ལྡན་པ་དག་ནི། སྤྱིར་དུ་ན། ཡུལ་ལྗོངས་དགེ་མཚན་དང་ལྡན་པ་དག་དང། དེ་ཡང་རིགས་མཐོ་ཞིང་ཆོ་འབྲང་ཕུན་སུམ་ཚོགས་པ་དང། རབ་ཏུ་བྱུང་བ་ལ་གེགས་མེད་ཅིང། འཐུན་པའི་རྐྱེན་འདོད་དགུའི་ཉིད་དུ་འབྱོར་པ་དང། ལོག་པའི་བཤེས་གཉེན་དང་མི་ཕྲད་ཅིང། ཡང་དག་པའི་དགེ་བའི་བཤེས་གཉེན་གྱིས་རྗེས་སུ་འཛིན་པ་གེགས་མེད་པའི་ས་ཕྱོགས་དག་ཏུ་སྐྱེ་བ་འཛིན་པ་དང། དེའི་མཐུས་ས་ཕྱོགས་དེར་དགེ་མཚན་དཔག་ཏུ་མེད་པ་འབྱུང་བ་ནི་རྟེན་ཅིང་འབྲེལ་པར་འབྱུང་བའི་ཆོས་ཉིད་དོ༎
དེའི་ནང་ནས་འདི་པའི་རིགས་ནི། སྔོན་གྱི་དུས་ཉིད་ནས་དགེ་བའི་བཤེས་གཉེན་དང། བྱང་ཆུབ་སེམས་དཔའ་མང་པོ་དག་དང། ཡུལ་ལྗོངས་ཀྱི་གཙོ་བོ་དང། སྡེ་པ་སོ་སོ་བདག་གི་བདག་པོར་གྱུར་པ་དག་མང་དུ་བྱུང་བའི་རུས་ཆེན་རྨ་ཞེས་བྱའོ༎
དེའི་རིགས་ལས་ཕྱིས་བྱོན་པ་ནི་བཀའ་གདམས་ཀྱི་ཁྲི་