[A:༩༣ན-༣༧༥] ༄༅། །རེ་ཤིག་བཞུགས། མུ་ཏིག་སྐུ་སྐྱེ་བ་སོགས་ལ་རྗེས་གནང་གི་ཚོགས་དུ་མ་དང། རྗེ་བཙུན་མ་སྒྲོལ་དཀར་མོ་སྤྱན་བདུན་མའི་སྒྲུབ་ཐབས་ལས་ཚོགས། ཇོ་བོ་རྗེའི་རྒྱ་གཞུང་ལ་བརྟེན་པའི་དབང་། གཞན་ཡང་ཟབ་མོ་གཅོད་ཀྱི་གདམས་པ་ཕོ་གཅོད་མོ་གཅོད་གཏེར་མའི་སྐོར་སོགས་ཁྲིད་ལུང་གི་རིམ་པ་གནང་ཏེ། སླར་དར་ལུང་དབེན་པའི་ནགས་ཁྲོད་དུ་ཕེབས་ཏེ། ཌཱ་ཀི་རས་ཆེན་པ་དཔོན་སློབ་བྱོན། བདག་ཅག་རྣམས་ཀྱི་མངོན་དུ་མ་གྱུར་པའི་གསུང་ཆོས་མཐའ་དག་པ་གསན་ཞེས་རས་ཆེན་པ་ཉིད་ཀྱིས་འཕྲོས་ཀྱང་གསུང། མངོན་དུ་གྱུར་པ་ནི། མོ་གཅོད་གཏེར་མའི་སྐོར་ཚང་བ་དང། མ་གཅིག་གྲུབ་པའི་རྒྱལ་མོ་ནས་བརྒྱུད་པའི་ཚེ་དཔག་མེད་ལ་བརྟེན་པའི་སྨིན་བྱེད་ཀྱི་དབང་གི་སྐོར་དང། གྲལ་བྱེད་ལམ་གྱི་རིམ་པ་སོགས་ཀྱིས་ཚིམས་པར་མཛོད་དེ། ཕྱིས་རྩ་རི་ཆུང་བར་གྲགས་པ་ཟངས་མཚོ་ལ་ཕྱིར་ཐེགས། དེ་ནས་ཡུན་མི་རིང་བ་ན་ཞིག་པོ་ཉི་མ་སེང་གེའི་དབོན་བརྒྱུད་ཆོས་རྗེ་རྡོར་གྲགས་པ་དཔོན་སློབ་མང་དག་ཕེབས། རྗེ་ཉིད་ཀྱི་དྲུང་དུ། གསང་འདུས་མི་བསྐྱེད་པ་གཙོ་བོར་གྱུར་པའི་རྒྱུད་སྡེ་ཆེན་པོ་བཞིའི་དབང། རྡོ་རྗེའི་ཕྲེང་བའི་དབང་གི་རིམ་པ་སློབ་དཔོན་ཨ་བྷ་ཡ་ཀ་རས་མཛད་པ་དང། གཞན་ཡང་གཅོད་ཡུལ་སྐོར་མ་ཚང་བ་མེད་པ། ཕྱག་རྒྱ་ཆེན་པོའི་ངོ་སྤྲོད་བདེ་བར་གཤེགས་པའི་བཀའ་དྲི་མ་མེད་པའི་ལུང་གི་རྒྱབ་