[A:༩༣བ-༣༧༦] རྟེན་དང་བཅས་པ་གསན། དེ་དག་གི་རྗེས་སུ་མཁས་པ་ལྕགས་པོ་ཅན་གྱི་དབོན་འཇིགས་མེད་འོད་འཕྲོ་ལ། ཟབ་པ་གཉིས་སུ་མེད་པའི་རྒྱུད་བཅོམ་ལྡན་འདས་དཔལ་དུས་ཀྱི་འཁོར་ལོའི་རྫོགས་པའི་རིམ་པ་རྣལ་འབྱོར་ཡན་ལག་དྲུག་གི་གནད་ཀྱི་དོན། ཁོ་བོ་ལ་ཇ་སྦྱོར་གཅིག་གི་བར་རྫོགས་པ་ཅིག་གནང་དགོས་ཤེས་གསོལ་བ་བཏབ་པ་ན། ལམ་འདི་མྱོང་བ་སྐྱེས་དངོས་སུ་ཁྲིད་ཀྱི་རིམ་པར་བཤད་པ་མ་གཏོགས། གང་ཐོད་ཐོད་ཐོས་ཐོས་དུ་བཤད་པར་མི་རིགས་ནའང། རྣལ་འབྱོར་གྱི་དབང་ཕྱུག་ཁྱེད་ཉིད་རྟོགས་པ་མངོན་གྱུར་ལགས་པས། ཁོ་བོས་ཀྱང་དཀོན་མཆོག་དང་ཆོས་བདག་ཡེ་ཤེས་ཀྱི་མཁའ་འགྲོ་ལ་གསོལ་བ་ལེགས་པར་བཏབ་སྟེ་འབུལ་བར་སྨོན་པ་དེ་ཀ་བྱེད་བཀའ་ཕེབས། ཕྱག་རྒྱ་ཆེན་པོའི་དོན་སྔར་ཉམས་སུ་བཞེས་པ་རྣམས། བསམ་པ་ཐམས་ཅད་ཡོངས་སྤངས་ནས། །ཉི་མ་གཅིག་ནི་ཡོངས་སུ་རྟག།བརྟག །ཅེས་པ་ལྟར། ལུས་ངག་སེམས་གསུམ་མི་གཡོ་བའི་ཏིང་ངེ་འཛིན་ལ་འཇོག་པ་ཐུན་མོང་མ་ཡིན་པ་སྔོན་འགྲོའི་ཚུལ་དུ་ངོ་སྤྲད། གལ་ཏེ་རྟགས་ནི་མ་བྱུང་ན། །དེ་ཚོ་ང་ཡི་བརྫུན་ཚིག་ཡིན། །ཞེས་གསུངས་པ་ལྟར་གྱི་ཏིང་ངེ་འཛིན་དེ་ཉིད་ལས་བརྩིས་པའི་སོར་སྡུད་དང་བསམ་གཏན་སྐུ་རྡོ་རྗེ་བསྙེན་པའི་ཡན་ལག། སྲོག་རྩོལ་དང་འཛིན་པ་གསུང་རྡོ་རྗེ་སྒྲུབ་པའི་ཡན་ལག། རྗེས་སུ་དྲན་པ་ཐུགས་རྡོ་རྗེ་ཉེ་བར་སྒྲུབ་པའི་ཡན་ལག། ཏིང་ངེ་འཛིན་སྒྲུབ་པ་ཆེན་པོའི་ཡན་ལག་ཡེ་ཤེས་རྡོ་རྗེའི་རྣལ་འབྱོར་ཏེ་