[A:༤༡༧]ལ་ཕ་མེས་བག་ཆགས་ཀྱི། །སེམས་ཕྱོགས་བོན་བསླབས་རྫོགས་ཆེན་ཕྱག་ཆེན་བསླབས། །ཞེས་དགུང་ལོ་བཅུ་ནས་འདྲི་ཀློག་རྩིས་སོགས་ལ་མཁས་པར་སྦྱངས། བཅུ་གསུམ་ནས་བླ་མ་གཡུང་དྲུང་རྒྱལ་པོ་ལ་བོན་གྱི་སྐོར་གསན་མཁས་པར་གྱུར་ཏེ་ཀ་པ་ལི་འདྲེན་པ་བདུན་བརྒྱ་ཙམ་གྱི་ཚོགས་པ་བསྐྱངས་ནས་བོན་གྱི་འཆད་ཉན་དང་བསྟན་བཅོས་མང་དུ་མཛད་པས་དབུས་གཙང་ཀུན་ཏུ་དར་རྒྱས་སུ་གྱུར་ནའང་བོན་འདི་གཤའ་མ་རང་ཞིག་མིན་པ་འདྲ་སྙམ་རྒྱ་གར་དུ་འབྱོན་པར་བརྩམས་ཚེ་ཡབ་ཡུམ་གཉིས་ཀྱི་རིང་མི་འབྱོན་པར་བཤོལ་བཏབ་ལ་བརྟེན། སྔགས་རྙིང་མ་བ་བླ་མ་འབྱུང་གནས་སེང་གེ་ལ་སེམས་ཀློང་མན་ངག་གི་སྡེ་རྣམས་གསན་ཞིང་སློབ་མ་སུམ་བརྒྱ་ཙམ་བསྐྱངས་ཀྱང་སྤྱོད་པ་ལ་མ་མགུ་བར་ལྷས་བསྐོར་བ་དང་སྦྲགས་བླ་མ་ནི་རུ་པར་ཕྱག་ཆེན། མཚན་བརྗོད། དོ་ཧ། དགྲ་འཇིགས་ཀྱི་སྐོར་སོགས་གསན་ནའང་ཐུན་མོང་གི་དངོས་གྲུབ་ཙམ་ལ་མ་རངས་པས། དེ་ཚེ་རྒྱ་གར་གྲུབ་ཐོབ་ཨ་མོ་གྷས། །འདི་ནི་སྤྲུལ་པའི་སྐུ་སྟེ་རྒྱ་གར་འགྲོ། །པཎྜི་ཏ་དང་གྲུབ་ཐོབ་ཐམས་ཅད་ཀྱི། །ཐུགས་བཅུད་བསྡུས་ནས་འགྲོ་རྣམས་སྨིན་གྲོལ་མཛད། །སྣ་ཚོགས་སྤྲུལ་པས་གདུལ་བྱ་འདུལ་བར་འགྱུར། །ཐེག་ཆེན་སྙིང་པོ་མཐའ་བྲལ་ཆོས་སྒྲ་སྒྲོག །མཐར་ཐུག་གསང་སྔགས་བདེ་སྟོང་དབྱེར་མེད་ཀྱི། །སེང་གེའི་ང་རོ་ཕྱོགས་བཅུར་སྒྲོག་པར་འགྱུར། །ཞེས་ལུང་བསྟན་དང་མཐུན་པར་ཞིང་བཙོངས་པ་དང་སྲུ་མོའི་གཡུ་སོགས་ལ་བརྟེན་པའི་གསེར་མང་པོ་བསྣམས་ནས་བྱོན་ཚུལ། དེ་ནས་རིན་ཅེན་གསེར་ཕྱེ་འཕོངས་མེད་ཁྱེར། །གཅེས་པའི་སྲོག་ལ་མ་བལྟས་དཀའ་སྤྱད་ནས། །རྒྱ་དང་བལ་པོའི་ཡུལ་དུ་ལན་