[A:1149]དང་མཉམ་པར་གྱུར། མི་མངས་དབུས་སུ་སུ་དང་ཆོས་གཏམ་བྱས་ཀྱང་ཁོང་རྒྱལ་བས་མི་རྣམས་ན་རེ། ན་བཟའ་སྐྱ་ལ་རིགས་བཟང་ཐལ་དུ་འགྲོ་བ་ཅིག་འདུག་ཟེར་བས་དོལ་པ་ཟང་ཐལ་དུ་གྲགས། སྐུ་ཚེའི་སྨད་ལ་ལུགས་སྨད་དུ་བཞུགས། ཆོས་མང་དུ་གསུངས། ལྔ་བཅུ་རྩ་དྲུག་ལ་གཤེགས། དེའི་སློབ་མ་རྒྱ་ནག་གཅེར་བུ་ནི། ཡུལ་ཁྲ་སྣ་བ། སྤྱིར་ཆོས་མང་དུ་གསན། ཡར་ཀླུངས་སྐྱའོ་དགོན་པ་ལ་གཅོད་ཆོས་འཆད་ཅིང་ཡོད་པའི་སྐབས་སུ་དོལ་པ་ཟང་ཐལ་བྱོན་ནས་གསན་པས་ཉོག་གེ་ལས་མ་བྱུང༌། ཕྱིས་དོལ་པ་ཟང་ཐལ་མཁས་པར་མཐོང་སྟེ། ད་ཅི་ནས་ཞོ་ཡུལ་དུ་དར་བ་བཙོངས། ད་ཁྱེད་ཀྱི་ཉམས་ང་ལ་གནང་བ་ཞུ་བྱས་ནས་མ་གཅིག་གི་གཅོད་སྐོར་རྣམས་ཚང་བར་ཞུས། གཉན་ཁྲོད་འགྲིམས་ཡར་ཀླུངས་གྱི་ཆུ་མིག་སྦལ་འདྲར་གཅོད་མཛད་པས་ཐོག་གསུམ་བབ་ཀྱང་མ་གནོད་པར་བསྙུན་ལས་གྲོལ་ལོ། གཅོད་ཀྱི་འབའ་ར་ནག་པོ་ཡང་བཏུལ། སྐུ་ཚེའི་སྨད་ལ་ཆུ་བོ་རིར་གཞན་དོན་མཛད་དེ། བདུན་ཅུ་བཞེས་པའི་ཚེ་དབྱིངས་རིག་བསྲེ་ན་འདི་ལྟར་བསྲེ་བ་ཡིན་གསུང་ནས་སྤྱི་གཙུག་ནས་ཡར་འོད་རྒྱངས་ཀྱིས་འཐོན་ནས་གཤེགས། དེའི་སློབ་མ་སངས་རྒྱས་རབ་སྟོན་ནི། བཟད་ཕུ་བྲག་དམར་བ། གསར་རྙིང་ཐམས་ཅད་ལ་མཁྱེན་པ་རྒྱས་ཤིང་ཕྱིས་རྒྱ་ནག་གཅེར་བུ་ལ་མ་གཅིག་གི་གདམས་པ་རྣམས་ཞུས་ཏེ་ཚེ་བློས་བཏང་ནས་རི་ཁྲོད་འབའ་ཞིག་འགྲིམས་ནས་བརྒྱད་ཅུ་ལ་གཤེགས། དེའི་སློབ་མ་སངས་རྒྱས་དགེ་སློང་ནི། ཡུལ་རྡོག་ཅན། གདུང་བ་ཤི། གཞོན་ནུ་ལ་རབ་