[A:1154]ཐམས་ཅད་དུ་སྙན་པས་ཁྱབ་སྟེ་འགྲན་ཟླ་མེད་པར་གྱུར། སོ་སོ་ཐར་པ་ཙམ་གྱི་ཆོག་མི་ཤེས་པར་སློབ་མ་རྣམས་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་ཀྱི་སེམས་ལ་བཀོད་དེ། དེའི་བསླབ་པའི་གནས་ངག་ལ་ཇི་ལྟར་སློབ་པའི་ཚུལ་གྱི་བསྟན་བཅོས་ཀྱང་མཛད། བྱང་ཆུབ་སེམས་དཔའི་བསླབ་པའི་གནས་ལ་བསྐལ་པ་བྱེ་བར་བརྩོན་པར་བྱས་ཀྱང་དེ་ཁོ་ན་ཉིད་རྟོགས་པའི་ཤེས་རབ་དང་མི་ལྡན་ན་འཁོར་བའི་རྒྱ་མཚོ་ལས་བརྒལ་བར་མི་ནུས་སོ་ཞེས་དགོངས་ནས། དེ་དག་གི་ཚུལ་ལེགས་པར་སྟོན་པའི་སྐྱེས་བུ་གསུམ་གྱི་ལམ་གྱི་རིམ་པའི་གདམས་ངག་ཀྱང་ཡི་གེར་མཛད། དེ་ལྟ་བུ་དེ་ལ་ལམ་གྱི་ཆ་རགས་པ་ཚང་ཡང་ཚེ་གཅིག་ཉིད་ལ་སངས་རྒྱ་བའི་སྔགས་ཀྱི་ཚུལ་ལ་འཇུག་དགོས་པར་དགོངས་ནས། དང་པོར་བླ་མ་བསྟེན་པའི་ཚུལ་དང༌། དེ་ནས་བླ་མས་གནང་བའི་དམ་ཚིག་དང་སྡོམ་པ་ཇི་ལྟར་བསྐྱང་བ་དང༌། དབང་བསྐུར་བ་སྔོན་དུ་འགྲོ་བས་རིམ་པ་གཉིས་ལ་ཇི་ལྟར་སློབ་པའི་ཚུལ་གྱིི་ལམ་གྱི་རིམ་པ་དང༌། བྱེ་བྲག་ཏུ་དཔལ་གསང་བ་འདུས་པའི་རྒྱུད་སློབ་དཔོན་འཕགས་པ་ཀླུ་སྒྲུབ་ཡབ་སྲས་ཀྱི་གཞུང་གཙོ་བོར་མཛད་པའི་གདམས་པ་དང་རྗེས་སུ་བསྟན་པའི་བསྟན་བཅོས་མང་དུ་མཛད། དེ་ཡང་དང་པོར་ཡུལ་ཕྱོགས་ཇི་ལྟར་རིགས་པ་རྣམས་སུ་ཞུ་ཞིང་གཞན་གྱི་དོན་མཛད་པ་ལས། ས་མོ་གླང་གི་ལོ་ཤ་བ་ལ་སྨོན་ལམ་ཆེན་མོ་མཛད་ཅིང༌། འདུས་པའི་སྐྱེ་བོ་རྣམས་ལ་ཆོས་ཀྱི་སྣང་བ་ཡང་བསྩལ་ནས། ལོ་དེ་ཉིད་ལ་དགེ་ལྡན་རྣམ་པར་རྒྱལ་བའི་གླིང་བཏབ། དེ་ནས་ཤིང་མོ་ལུག་གི་ལོ་ལ་འོན་གྱི་བཀྲ་ཤིས་དོ་ཁར་