R908: དེབ་ཐེར་སྔོན་པོ།

[A:1157]རྣམས་ཚང་བར་ཞུས། ཉམས་མྱོང་ཡང་ཐད་ཀར་བསྐྱངས། གསེར་ལུང་དུ་ཆོས་གསན་འཕྲོ་ལ་བསྙུང་ནད་དྲག་པོས་བློ་བུར་དུ་བཏབ་ནས། རི་ཁྲོད་ཅིག་ཏུ་སྐྱོལ། གཅོད་བྱེད་གསུངས་པས། གྲོགས་མཆེད་ཀུན་གྱིས་གཉན་ཁྲོད་དུ་ཁུར་ནས་བསྐྱལ། དེར་གཅོད་བསྐྱངས་པས། ཉམས་མྱོང་སྐྱེས། ཡང་གཡམ་བཟངས་ཁྲི་དཔོན་བྱང་ནས་ཕེབས་ཤིང་མར་གདན་དྲངས་པའི་སར་མཇལ་འགྲོ་དགོངས་ནས་བྱོན་པས་ཤུགས་ཀྱི་ལམ་ཁ་ཅིག་ཏུ་གནམ་གདོན་ཅར་ཕོག་རྒྱབ། འབྱོན་མ་ཤེས་པས་ཞབས་ཏོག་པས་ཁུར་ནས་ལམ་ཞོགས་ཀྱི་རིའུ་རིལ་ཁྲོད་གཅིག་ཏུ་བསྐྱལ། ལྷ་རྗེ་ལ་རྩ་བསྟན་པས་སྨན་བཅོས་ལ་འབུངས་ན་འཚོ་ཨེ་སྲིད་ཟེར་བས། སྨན་མི་བྱེད་དགེ་སྦྱོར་ཅིག་བྱེད་གསུངས་ནས། དེ་ནས་གྲི་མདོའི་ཞོགས་ཀྱི་བྲག་ཕུག་གཅིག་ཏུ་ཁུར་ནས། གདན་དྲངས། དེར་ཡང་ལྷ་རྗེ་བོས་པས་ད་གསོལ་བ་མི་ཐེབས་པར་འདུག་ཟེར། ཁྱེད་ཚོ་ངའི་ཐོ་ཕྱིར་མ་འདུག་གསུང་ནས་བསྐྲད་དེ་ན་དགའ་ཤི་སྐྱིད་ལ་བཏང་བས་སང་དེ་ནས་ཅུང་དྭངས། དེ་ནས་ཞག་གསུམ་བཞི་ན་གཡམ་བཟངས་བའི་ཁྲི་ཆུང་འོད་ཀྱིས་ལྷ་རྗེ་ཁྲིད། ཤ་ཁོག་གསུམ་བཞི་ཁྱེར་ནས་བྱོན་པས་ལྷ་རྗེས་རྩ་བལྟས་པས་ནད་སོལ་འདུག་ངོ་མཚར་ཆེ་ཟེར། སྐུ་ཁམས་སྔར་བས་བཟང་བ་ཞིག་བྱུང༌། ཐར་པ་གླིང་བ་ལ་སྒྲོལ་མ་དཀར་མོའི་ཚེ་སྒྲུབ་སྐོར་དང་ཁྲིད་ཆེན་བརྒྱད་སོགས་མང་དུ་ཞུས། བླ་མ་བློ་གྲོས་དཔལ་བ་ལ་གསང་འདུས། གཤེད་དམར། རྡོ་རྗེ་ཕྲེང་བ་ལ་སོགས་ཀྱི་དབང༌། སྦྱོང་རྒྱུད་ལ་སོགས་པའི་རྒྱུད་ཀུན་གསན། བླ་མ་རིན་