[A:138]ཏེ་སྲོང་བཙན་གྱིས་མཛད་པའི་གཤིན་རྗེ་གཤེད་སྐོར་གྱི་སྒྲུབ་པའི་དཔེ་ནི། དིང་སང་ཡང་སྣང་ངོ༌། །མཁན་ཆེན་ལས་ཀྱི་རྡོ་རྗེ་ལ་དཔལ་གསང་བའི་བདག་པོ་ཉིད་ཀྱི་སྐྱེ་བ་སྔ་ཕྱིའི་ལུང་བསྟན་སྩལ་ཏེ། དེ་ཡང་ལས་ཀྱི་རྡོ་རྗེ་བ་ཡར་ཀླུངས་སུ་ཀླུར་སྐྱེས་པའི་ཚེས། གཤིན་རྗེ་གཤེད་ཀྱི་རྣལ་འབྱོར་པ་ཅིག་ལ་གནོད་པ་བསྐྱལ་བས། དེས་སྦྱིན་སྲེག་བྱས་ཏེ་ཀླུ་འཁོར་དང་བཅས་པ་ཚིག་པར་བྱས་པས་ཤི་འཕོས་ཏེ་ལྗང་ཚ་ལྷ་དཔོན་དུ་སྐྱེས་སོ་ཞེས་བྱ་བའི་གཏམ་གསུངས་སོ། །དེ་ནས་ཁྲི་སྲོང་ལྡེ་བཙན་གྱིས་མཁན་ཆེན་ཞི་བ་འཚོ་སྤྱན་དྲངས། བོད་འབངས་མང་པོ་རབ་ཏུ་ཕྱུང༌། འདུལ་བའི་བསྟན་པ་དར་བར་བྱས་པས། བསྟན་པ་དར་ཞིང་རྒྱས་པར་མཛད་དོ་ཞེས་གྲགས་པ་ཡང་དོན་དང་ལྡན་ནོ། །གཞན་ཡང་དེའི་རིང་ལ་པདྨ་སམྦྷ་བ་བྱོན་ནས་གསང་སྔགས་དར་བར་མཛད་པ་ལ། པདྨ་ཉིད་ཀྱིས་རྡོ་རྗེ་ཕུར་པ་དང་དཔལ་རྟ་མགྲིན་གཉིས་རྒྱལ་པོ་ལ་གནང་ཞིང༌། བྱེ་བྲག་ཏུ་རྒྱལ་པོས་དཔལ་རྟ་མགྲིན་གྲུབ་ཏེ། རྟ་སྐད་ལན་གསུམ་དུ་གྲགས་པ་ཕལ་ཆེ་བས་ཐོས།
ཕུར་པ་ནི་པདྨས་ཇོ་མོ་དང་འབྲེ་ཨ་ཙར་ས་ལེ་ལ་སྩལ་བས། དེ་ནས་བརྒྱུད་དེ་ལུགས་སྣ་ཚོགས་སུ་གྱུར་ཅིང་ཤིན་ཏུ་དར་རོ། །འཇམ་དཔལ་སྐུ་ནི་སློབ་དཔོན་ཤཱནྟིཾ་གརྦྷ་བོད་དུ་བྱོན་ནས་དར་བ་མཛད་ཅིང༌། འདིས་བསམ་ཡས་ཀྱི་རབ་ཏུ་གནས་པ་བྱས་སོ་ཞེས་ཀྱང་གྲགས་སོ། །ཡང་དག་གི་སྐོར་ནི་སློབ་དཔོན་ཧཱུཾ་ཀ་ར་ཞེས་བྱ་བ་བོད་དུ་བྱོན་ནས་སྐལ་བ་དང་ལྡན་པ་རྣམས་ལ་སྦྱིན་པར་གྲགས་ཏེ། འདི་ནི་དོན་དུ་ན་སངས་རྒྱས་མཉར་ལ་མ་སྦྱོབརྟེན་པ་ཡིན་