[A:225]འཕྲུན་དུ་བསྲུང་སྐྱོབ་ཞར་རེ་བྱས་པས་ཆོས་རྒྱགས་ལྡང་བར་བྱུང༌། རྡོ་རྗེ་ཟམ་པའི་བྱིན་རླབས་མ་གཏོགས་པ་ཚོ་གནང༌། དེ་བྱེད་པ་ལ་འཇེན་ཅི་ཡང་མེད་པས་ཞུ་བ་མ་བྱུང་བ་ལ། སློབ་དཔོན་གྱི་ཞལ་ནས་བྱིན་རླབས་ད་ལྟ་བྱ། ཕྱི་ནས་བར་ཆད་འོང་གསུང༌། གངས་པར་དུ་གྲོགས་པོ་ཞིག་ལ་པིར་མོ་ཞིག་བཅོལ་ཡོད་པའི་རིན་སློང་དུ་ཕྱིན་པས། ཇོ་མོ་བ་བཅོམ་པའི་ཤམ་ཐབས་ཤིག་བྱིན། དེའི་སྣམ་བུ་ཚོ་ཕྲལ་ནས་བཙོངས། ཆང་ཕུད་དང་གཏོར་མ་དང་ནས་བྲེ་ལྔ་ཤ་གཟུགས་གཅིག་རྣམས་ལ་བརྟེན་ནས། མར་མེའི་དོད་ཉིན་པར་བྱའོ་གསུང་ནས། གྲོལ་ལམ་དབང་བཞི་རྫོགས་པར་བསྐུར། གདམས་ངག་མ་ལུས་པར་གནང༌། བྱིན་རླབས་ཕྱི་ནས་ཀྱང་ལན་བཞི་ཙམ་གནང༌། ཞབས་ཏོག་ཀྱང་ནས་དང་གསེར་ལ་སོགས་པ་ལན་གང་མོ་བྱ་བ་ཞིག་ཡོད། སློབ་དཔོན་གྱི་ཞལ་ནས། སྣང་བ་འདི་ཀུན་བདེན་སྙམ་པ་མི་འདུག་གསུང་ནས། ཆུ་རྡོ་རྗེ་ཅིག་ལ་ཕྱག་ཆར་གྱིས་རྒྱབ་པས་གྲུ་མོ་མན་ཆད་ཐིམས་ཀྱིས་སོང༌། སྐུ་ལུས་ཕྱིར་ཤིགས་ཀྱིས་མཛད་པས་བྲག་ལ་སྐུ་ལུས་ཐིམ་གྱིས་སོང་ནས་རྗེས་ཝལ་ལེ་བྱུང༌། ཕུག་ཆུང་རོང་ནས་ཏིང་ངེ་འཛིན་གྱིས་ཤུག་པའི་གདུང་མང་པོ་དྲངས་ནས། ཇོ་མོའི་མཆོད་ཁང་ཕུབ་པའི་ཤིང་རྣམས་ཡིན་གསུང༌། སྦ་སྒོམ་ལ་ཇོ་བོ་རྗེའི་ཕ་རོལ་དུ་ཕྱིན་པའི་ལམ་རྐྱང་ཁུག ར་མ་པཱ་ལའི་གདམས་པ་ཞུས། འུ་ལུག་ཏུ་དགེ་བཤེས་ཧབ་ཀྱིས་ཞུ་བ་བྱས་ནས། ཡུ་མོ་ལ་དུས་འཁོར་གྱི་སྦྱོར་དྲུག་ཞུས།