[A:240]ཚིག་བརྒྱུད་ནི་གང་ཟག་བརྒྱུད་པ་ལ་ཡང་ཡོད་དོ།
།ཕྱི་མའི་དུས་ཤིག་ན་མྱང་མི་དར་མ་དང་དུས་མཚུངས་པའི་གནས་བརྟན་ལྡང་མ་ལྷུན་རྒྱལ་ཞེས་བྱ་བས་གཏེར་རྣམས་ཕྱུང༌། རང་གིས་ཉམས་སུ་བླངས། གཞན་སྣོད་ལྡན་བཙལ་བས། མྱང་སྟོད་ནས་ལྕེ་བཙུན་སེང་གེ་དབང་ཕྱུག་བྱ་བ་རྙེད་དེ། དེ་ལ་གདམས་པ་རིམ་པ་བདུན་བཏབ། དེ་དང་དུས་ཉེ་བར་ཁ་རག་སྒོམ་ཆུང་ལ་ཡང་བཏབ་པས་ཁོང་ཡང་དེས་གྲོལ་ཟེར།
ཕྱི་ཞིག་ན་ལྕེ་བཙུན་གྱི་ལྡང་མ་ལ་ནོར་ཤིན་ཏུ་མང་པོ་འབུལ་དུ་འོངས་པ། མལ་གྲོའི་མྱང་བཀའ་གདམས་པ་དང་སྙེ་ཐང་དུ་ཕྲད་ནས། དེས་ལྡང་མ་གཤེགས་པའི་གཏམ་རྣམས་བཤད་པས། དེ་ན་གནས་གཞི་ཞིག་འདུག་པའི་དགེ་འདུན་རྣམས་ལ་ཕུལ། མྱང་བཀའ་གདམས་པས་ལྕེ་བཙུན་བླ་མ་ལ་འབུལ་བ་བཟང་པོ་བྱེད་པ་ལས་དཔགས་ནས། ཁྱེད་ལ་གདམས་པ་ཟབ་མོ་ཡོད་པར་འདུག་བྱས་ཏེ་ཞུས་པས། ལྕེ་བཙུན་གྱིས་མྱང་བཀའ་གདམས་པ་ལ་གདམས་པ་རྣམས་གནང༌། དེས་གཞོའི་ཏི་སྒྲོ་བྲག་ལ་བསྒོམས་པས་ཕུང་པོ་ལྷག་མེད་དུ་གྱུར། ཡང་ལྕེ་བཙུན་གྱིས་འུ་ཡུག་ཡན་ཆད་ཤངས་མན་ཆོད་ཀྱི་རི་རྒྱུད་རྣམས་ལ་གནས་འཕོ་ཞིང་བསྒོམ་པའི་གྲུབ་པ་བརྙེས་ཏེ། དེ་ནས་ཡང་ལོ་ལྔ་བཅུ་བཞུགས། དེ་ནས་ཟག་བཅས་མི་སྣང་བར་འོད་དུ་གྱུར། ཁོང་གིས་གདམས་པ་རྣམས་འུ་ཡུག་དང་ཡང་གྲོའི་འཆད་པ་ལྟག་དང༌། ཇལ་གྱི་ཕུ་སྟེ་གཏེར་ཁ་གསུམ་དུ་སྦས།
གཏེར་སྦས་ནས་ལོ་སུམ་ཅུ་ན་རོང་སྣར་མདའི་ལྕེ་སྒོམ་ནག་པོས་གཏེར་འགའ་ཞིག་བཏོན། རང་གིས་ཉམས་སུ་བླངས་ཤིང་