[A:248]དམར་དུ་དཔོན་པོ་བྱང་གྲུབ་ལ་ཡང་དགོན་པའི་རི་ཆོས་རྣམས་ཞུས་ནས། གྲུབ་ཆེན་པ་དང་མཇལ། མར་ལམ་བླ་མ་བཀྲ་ཤིས་ལུང་པ་ལ་གཤིན་རྗེ་དགྲ་ནག་ལ་སོགས་པ་ཞུས། སློབ་དཔོན་ཡེ་མགོན་ལ་སོགས་པ་ལ་གསང་སྐོར་དང༌། རྒོད་ཚང་པའི་ཁྲིད་རྣམས་དང༌། ཨ་རོའི་ཁྲིད་མོ་ཆེ་དང་དོན་སྐོར་ལ་སོགས་པའི་ཞུན་དར་ཆོད་པར་མཛད་ནས། ཐོས་བསམ་གྱིས་སྒྲོ་འདོགས་ཆོད་པར་མཛད། ཙ་རི་གསར་མ་བསྐོས་ནས། རྙིང་མའི་འགྲམ་དུ་གཅིག་པོར་ཟླ་བ་བརྒྱད་བཞུགས་པས་ཆོ་འཕྲུལ་ཆེན་པོ་དང༌། ཛམ་ལྷས་ནོར་བུ་བྱིན་པ་དང༌། གཞི་བདག་གིས་ཁང་པར་སྤྱན་དྲངས་ནས་བསྙེན་བཀུར་བྱས་པ་དང༌། མཚོའི་དཀྱིལ་དུ་འོད་ལྔའི་ལྦུ་བ་སེལ་བོ་ཙམ་ཅིག་ལ་ཅིག་ཐིམ་དུ་འགྲོ་བ་ལ་སོགས་ངོ་མཚར་ཅན་མང་དུ་མཐོང༌། དུས་རྟག་ཏུ་རི་ཁྲོད་དང་གངས་ཁྲོད་འབའ་ཞིག་ཏུ་བཞུགས་ཏེ་སྒྲུབ་པ་སྙིང་པོར་མཛད། ཀར་མ་པ་རང་བྱུང་རྡོ་རྗེ་ལ་སོགས་པ་མང་པོ་ལ་གསང་བ་བླ་ན་མེད་པའི་ཆོས་ཀྱི་འཁོར་ལོ་མང་དུ་བསྐོར། ལམ་རྒྱ་དང་ཉ་རྒྱ་དང་རི་རྒྱ་ལ་སོགས་ཀོང་པོ་ནས་གཡེ་ལ་ཐུག་གི་བར་དུ་བསྡམས། སྙིང་ཐིག་གི་གདམས་པ་རྫོགས་རིམ་གཞན་དང་མ་འདྲེས་པར། ཆོས་ཀྱི་རང་སྐད་གྲུབ་མཐའ་རྩལ་དུ་བཏོན་ནས་གསུངས་ཏེ། བདུན་ཅུ་རྩ་བརྒྱད་པ་ཆུ་མོ་ལུག་གི་ལོ་ལ་གཤེགས།
དེ་ལ་ཀློང་ཆེན་པས་ཞུས་པ་ཡིན་ཏེ། དེ་ནི་གཡུ་རུ་གྲའི་ཕུ་སྟོད་གྲོང་ཞེས་བྱ་བར། སློབ་དཔོན་བསྟན་བསྲུངས་དང་འབྲོམ་གཟའ་མོ་བསོད་ནམས་རྒྱན་གཉིས་ཀྱི་སྲས་སུ་ས་ཕོ་སྤྲེའུ་ལ་འཁྲུངས། ལོ་