[A:255]
དུམ་བུ་་བཞི་པ། གསང་སྔགས་གསར་མ། ལམ་འབྲས་རྗེས་འབྲང་དང་བཅས་པའི་སྐབས།
གསར་མའི་འགྱུར་མགོའི་སྐབས།
དེ་ལྟ་མོད་ཀྱི་དབུས་གཙང་དང་མངའ་རིས་ཀྱི་ཕྱོགས་སུ་སྔགས་ཀྱི་གདམས་པ་འགའ་རེ་ཐོབ་ཀྱང་སྤྱོད་པ་འཆོལ་ཏེ། དེ་ཁོ་ན་ཉིད་ཀྱི་ཏིང་ངེ་འཛིན་དང་བྲལ་བས་སྦྱོར་སྒྲོལ་དང་གཏད་སེར་ལ་སོགས་པའི་རྩུབ་ཆོས་མང་དུ་བྱུང་ཞིང༌། དེ་དག་མངའ་རིས་ཀྱི་རྒྱལ་པོ་རྣམས་ཀྱིས་གཟིགས་པས་དངོས་སུ་སུན་ཕྱུང་བ་མ་མཛད་ཀྱང༌། པནྚི་ཏ་མཁས་པ་མང་པོ་སྤྱན་དྲངས་ནས་ཡང་དག་པའི་ལམ་ལ་སྐྱེ་བོ་རྣམས་བཙུད་པ་ཉིད་ཀྱིས་ཉེས་པ་དེ་དག་ཐབས་ཀྱིས་ཞི་བར་མཛད་ལ། ཇོ་བོ་རྗེས་ཀྱང༌། དང་པོའི་སངས་རྒྱས་རྒྱུད་ཆེན་ལས། རབ་ཏུ་འབད་པས་བཀག་པའི་ཕྱིར། གསང་དབང་ཤེས་རབ་དབང་བསྐུར་ནི། ཚངས་པར་སྤྱོད་པས་བླང་མི་བྱ། ཞེས་གསུངས་པས། སྔགས་པ་ཁྱིམ་པའི་རྩིང་ཆོས་རྣམས་ཀྱང་ཤུགས་ཀྱིས་བཀག་པ་ཡིན་ནོ། །གསང་སྔགས་གསར་མའི་འགྱུར་གྱི་མགོ་ཇོ་བོ་སྨྲྀ་ཏིས་བཙུགས་སོ་ཞེས་བྱ་བ་ཡོད་མོད་ཀྱི། དེས་དབུས་གཙང་དུ་ནི་འགྱུར་མ་མཛད་ལ། ཁམས་སུ་དུས་ཕྱིས་མཚན་ཡང་དག་པར་བརྗོད་པ་སྒེག་པ་རྡོ་རྗེའི་སྐོར་དང་།