[A:600]མཁའ་ལ་འཇའ་འོད་ཀྱི་དཀྱིལ་ན་བཞུགས་པ་དང༌། སེང་གེ་ལ་བཅིབས་པ་དང༌། ཉི་ཟླ་སྐར་མའི་སྟེང་ན་བཞུགས་པ་ལ་སོགས་པ་མཐོང་སྣང་མང་པོ་ཡང་ཤར་བར་གྱུར་རོ། །དེ་ནས་སློབ་དཔོན་གུའི་གུང་བས་དངུལ་བྲེ་ཆེན་བརྒྱད་ཅུ་ལ་བརྡུངས་པའི་མཆོད་རྟེན་སྐུ་གཟུགས་དུ་མས་བརྒྱན་པ་ལ་སོགས་པའི་རྟེན་མང་པོ་བསྒྲུབ་པ་ལ་སོགས་པ་འཚུར་ཕུ་དང་ཀར་མའི་གདན་ས་གཉི་གར་མཛད་དེ། བསྟན་པ་རྒྱས་པར་མཛད་དོ། །དེའི་སྐུའི་སྐྱེ་བ་ཆོས་རྗེ་དེ་བཞིན་གཤེགས་པ་ནི། ཤིང་ཕོ་བྱི་བའི་ལོ་ལ། ཡུལ་མྱང་པོ་བྱེ་བྲག་ཨེ་ལ་མྱང་འདི་རུ། ཡབ་སྔགས་པ་གུ་རུ་རིན་ཆེན་དང༌། ཡུམ་ལྷ་མོ་སྐྱིད་ཀྱིས་སྲས་སུ་འཁྲུངས། ལྷུམས་སུ་ཞུགས་པའི་དུས་ཡིག་དྲུག་དང་ཨཱ་ལི་ཀཱ་ལི་གསུངས་པ་མིས་ཐོས་པ་བྱུང༌། ཡུམ་གྱི་རྨི་ལམ་དུ་སྒར་པ་ཡུལ་ཕྱོགས་དེར་ཕེབས་པའི་སྣང་བ་དང༌། མེ་ཏོག་གི་ཆར་འབབ་པ། འཇའ་ཚོན་གྱི་དྲ་བས་འབྲེལ་བ།
དྲི་བཟང་གི་ངད་ལྡང་བ་ལ་སོགས་ལྟས་ཁྱད་པར་ཅན་ཡང་མང་དུ་བྱུང༌། ལྷས་ཡིད་བསྐུལ་ནས་ཆོས་རྗེ་རིན་པོ་ཆེ་ཡུལ་ཕྱོགས་འདིར་འབྱོན་པར་ངེས་སོ་ཞེས་སྐྱེ་བོ་ཕལ་པ་རྣམས་ཀྱང་ངེས་པའི་ཤེས་པ་ཡོད་ཡོད་སྐད་དུ་སྒྲོག་པར་བྱེད། བལྟམས་ནས་ཟླ་བ་གཉིས་ཙམ་སོང་བ་དང་མཁན་ཆེན་མགོ་བློན་པས་མཇལ་བས་དགྱེས་པའི་རྣམ་འགྱུར་དུ་མ་བསྟན། ལོ་གཅིག་ཙམ་བཞེས་པ་ན་གསག་མོའི་སྟེང་དུ་ཕེབས་པ་དང༌། ཀ་སྒྲོག་གི་སྟེངས་སུ་འབྱོན་པ་རྣམས་མཛད། ལོ་གཉིས་པ་ལ་སྒར་བ་རྣམས་ཕབས་ནས་སྒར་མཛད་ནས་སྣེ་བོར་ཐེགས། མངོན་པར་མཁྱེན་པ་རྒྱ་ཆེན་