[A:603]པའི་འབུལ་བ་ལའང་དངུལ་བྲེ་བདུན་བརྒྱ་ཙམ་ཕུལ་ནས་བོད་དུ་ཕེབས་སོ། །དེ་ནས་ཁམས་ཀྱི་ས་ཆ་རྣམས་སུའང་སེམས་ཅན་རྣམས་ཡང་དག་པའི་ལམ་ལ་བཀོད། དབུས་སུ་སྔ་ཕྱིར་ཕེབས་ནས་དགེ་བའི་བཤེས་གཉེན་ཆེན་པོ་རྣམས་དང༌། སྒོམ་ཆེན་པ་དང༌། ཐོས་བསམ་པ་དང༌། སྔགས་པ་ལ་སོགས་པའི་ཚོགས་མཐའ་ཡས་པ་རྣམས་དང༌། དབང་གྲགས་པ་རྒྱལ་མཚན་ལ་སོགས་པའི་མི་དཔོན་ཆེ་ཕྲ་དུ་མ་དང༌། སྐྱེ་བོ་ཐ་མལ་བ་རྣམས་ཀྱང་གནང་སྦྱིན་དང༌། གདམས་པ་བསྟན་པ་དང༌། ཞལ་མཐོང་བ་དང༌། ཕྱག་གིས་དབང་བསྐུར་བ་ལ་སོགས་པས་ཐམས་ཅད་བྱང་ཆུབ་ཀྱི་ལམ་ལ་བཀོད། སྤྱིར་མཁན་ཆེན་བསོད་ནམས་བཟང་པོ། སློབ་དཔོན་གུའི་གུང་བ། ཆོས་རྗེ་མཁའ་སྤྱོད་དབང་པོ། མཁན་ཆེན་རྒྱལ་མཚན་དཔལ། མཁན་ཆེན་ཡོན་བློ་བ། བཀའ་བཞི་པ་ནི་རིན་ཆེན་དཔལ། རྒྱ་སངས་རྒྱས་དབང་ཕྱུག་ལ་སོགས་པ་རྣམས་ལས་མདོ་དང་སྔགས་དང་ཟབ་མོའི་གདམས་པ་དཔག་ཏུ་མེད་པ་དང་དབང་ལ་སོགས་པ་གསན་པའི་རྫུ་ཡང་རྒྱ་ཆེར་མཛད། འདས་མ་འོངས་ཀྱི་འདི་དང་འདིའོ་ཞེས་པའི་གསུང་ཡང་མང་དུ་གསུངས། གཞན་ལ་ཆོས་བསྟན་པས་སྨིན་ཅིང་གྲོལ་བར་མཛད་པའི་གང་ཟག་ཀྱང་གྲངས་ཀྱིས་མི་ཆོད། དེ་རྣམས་ཀྱི་ནང་ནང་མཆོག་ཏུ་གྱུར་པ་ནི་གུ་ཤྲཱི་སངས་རྒྱས་རིན་ཆེན། གུ་ཤྲཱི་བློ་གྲོས་རྒྱལ་མཚན། གུ་ཤྲཱི་རིན་ཆེན་དཔལ། གུ་ཤྲཱི་དོན་གྲུབ་འོད་ཟེར། གུ་ཤྲཱི་ཆོས་ཀྱི་རྒྱལ་མཚན། གུ་ཤྲཱི་ཤཱཀྱ་བཟང་པོ། བཀའ་བཞི་པ་རིན་ཆེན་བཟང་པོ། སྤྲུལ་སྐུ་ཆོས་དཔལ་ཡེ་ཤེས། ངོམ་