[A:622]ཐབས་རྣམས་ཞུས། དུས་གསུམ་མཁྱེན་པའི་ཕྱག་དྲིལ་ཡིན་ཟེར་བ་ཅིག་ཀྱང་གནང༌། གནམ་བར་གྱི་སློབ་དཔོན་དབུ་མ་བ་ལ་བདེ་དགྱེས་ཀྱི་དབང་དང༌། ཡོ་གའི་དབང་ཕྱག་ལེན་དབྱངས་བྲི་ཐིག་དང་བཅས་པ་བསླབས། དེ་ནས་གསང་ཕུར་བྱོན་ནས་བླ་ཆོས་བ་འཇམ་དབྱངས་ཤཱཀ་གཞོན་དང༌། ཟུར་ཆོས་པ་སློབ་དཔོན་བློ་གྲོས་མཚུངས་མེད་ལ་གཏུགས་ནས་མཚན་ཉིད་ཀྱི་སྡེ་སྣོད་ས་སྡེ་ལྔ་དང༌། བྱམས་ཆོས་ལྔ་དང༌། ཚད་མ་རྣམ་ངེས་དང༌། སྡུད་པ་དང་སྤྱོད་འཇུག་ལ་སོགས་པ་མང་དུ་ཞུས། ཁྱད་པར་ཕར་ཕྱིན་གྱི་ཊཱི་ཀ་ཅིག་བརྩམས་པ་སློབ་དཔོན་བློ་གྲོས་མཚུངས་མེད་ཀྱིས་གཟིགས་པས་ལེགས་པོ་བྱུང་འདུག་ནའང་སྒྲོས་འཛིན་མི་ནི་མི་འོང་ཞོག་གསུང་ནས་རྩོམ་འཕྲོ་བཞག དེ་ནས་ཆོས་རྗེ་རང་བྱུང་རྡོ་རྗེ་ཀོང་པོ་ནས་ཕེབས་ཏེ། འཚལ་པ་དགའ་བདེ་གཤེགས་པའི་སྟོན་མོའི་གྲལ་དབུ་མཛད་པའི་སར་ཆོས་རྗེ་མཇལ་དུ་བྱོན། ལོ་བཞི་ན་ཕར་ཕྱིན་གྱི་ཆོས་སྐད་བྱང་བའི་སྙན་པ་ཐོབ། གསང་ཕུར་བཞུགས་དུས་རྒྱ་བྲག་ཆོས་རྗེ་སྙན་པ་ཆེ་བས་མཇལ་དུ་བྱོན་པས། ཞལ་མཐོང་བ་ཙམ་གྱིས་སྣང་བ་འགྱུར་ནུས་པ། སྟོང་ཉིད་སྙིང་རྗེ་འབྱོངས་པ། སྤྱན་སྔར་བསྡོད་པ་ལ་ཏིང་ངེ་འཛིན་སྐྱེ་བ་ཅིག་འདུག་པ་ཤིན་ཏུ་མོས་ཏེ། ཞི་བྱེད་མཐའ་བྲལ་གསུམ་གྱི་གདམས་པ་ངོ་སྤྲོད་དང༌། དབུ་མ་ལུགས་ཀྱི་སེམས་བསྐྱེད་ཞུས། གསང་ཕུར་ཀུན་དྲིལ་བས་ལོ་བདུན་བཞུགས། སྒྲོས་གསར་རྙིང་གི་ཆགས་ལྡང་ལ་སྐྱོ་བ་སྐྱེས་ནས། ཆོས་རྗེའི་དྲུང་ནས་སྐུངས་