[A:638]གསུང་པ་གསལ་བར་གཟིགས་ཤིང༌། དགུང་ལོ་གསུམ་པ་ནས་སྐྱེ་བོའི་ཚོགས་དུ་མ་ལ་སྤྱན་རས་གཟིགས་ཀྱི་བསྒོམ་བཟླས་གནང་བ་དང༌། གཞན་རྒྱུད་མཁྱེན་ནས་ཇི་ལྟ་བ་བཞིན་གསུང་བ་མང་པོ་སྣང་ངོ༌། །དགུང་ལོ་དྲུག་བཞེས་པ་ན་སྔོན་གྱི་གདུལ་བྱར་གྱུར་པ་འགའ་ཞིག་ལ་རྟོགས་ལྡན་གྲགས་པ་སེང་གེའི་སྐྱེ་བ་ཡིན་པར་ཞལ་གྱིས་བཞེས་ཤིང༌། སྔོན་གྱི་སྤྱོད་པ་རྣམས་ཞིབ་ཏུ་གསུང་པ་མཁས་གྲུབ་དར་རྒྱལ་བས་གསན་ནས་གདན་འདྲེན་པ་ལ་དཔོན་སློབ་མང་པོ་བྱོན། མཇལ་ཙམ་ནས་ཡིད་ཆེས་པའི་ཞལ་བརྡ་དང་གུས་པའི་ཚུལ་མཛད་པས་ཐུགས་རངས་ནས་འཚུར་གནས་ནང་དུ་འབྱོན་པར་ཆས་པའི་ལམ་བྱེ་ལུང་གི་ཆུ་མདོར་དཔོན་སློབ་རྣམས་ཆུའི་དབུས་སུ་ལྷུང་ནས་འཇིགས་པ་དང་བཅས་པར་གྱུར་པ་ན། མངོན་སུམ་དུ་རྗེ་བཙུན་མ་སྒྲོལ་མས་བསྐྱབས་ཏེ་བདེ་བར་ཐོན་པ་དང༌། འཚུར་ཕུར་དགེ་སློང་དར་ཚུལ་ཁྲིམས་ལ་ནམ་མཁའ་འོད་དུ་སྐྱེས་པའི་རབས་གསུངས། དགུང་ལོ་བདུན་པ་ལ་ཆོས་ཀྱི་རྗེ་རོལ་པའི་རྡོ་རྗེ་དང་མཚོ་སྨད་དུ་མཇལ། དགེ་བསྙེན་གྱི་སྡོམ་པ་དང་བྱང་ཆུབ་མཆོག་ཏུ་སེམས་བསྐྱེད་པ་མནོས། ཆོས་དྲུག་དང་ཕྱག་རྒྱ་ཆེན་པོ་སོགས་ཀྱི་ཁྲིད་གསན། བདེ་ཆེན་མཁན་ཆེན་རིན་པོ་ཆེ་དོན་གྲུབ་དཔལ་བ་དང༌། སློབ་དཔོན་ཆོས་རྗེ་རོལ་པའི་རྡོ་རྗེས་མཛད་ནས་རབ་ཏུ་བྱུང་ཞིང༌། མཚན་ཡེ་ཤེས་དཔལ་ཞེས་གསོལ། མཁན་ཆེན་རིན་པོ་ཆེ་ལ་ཀྭ་རི་ཀཱ་སོགས་ཆོས་ཕྲན་འགའ་ཞིག་གསན། ཆོས་རྗེ་གཡུང་སྟོན་པ་ལའང་སྒྲོལ་དཀར་གྱི་ཚེ་སྒྲུབ་ཞུས། རྗེ་རི་ཁྲོད་པ་ལ་རྒྱུད་འབུམ་