[A:639]དང༌། མདོ་མང་ཕལ་ཆེ་བའི་ལུང་དང༌། དབང་རྗེས་གནང་མང་དུ་གསན། ཁྱད་པར་དུ་ཡང་བཀའ་བརྒྱུད་ཀྱི་མན་ངག་ཟབ་ཅིང་རྒྱ་ཆེ་བ་ཕལ་ཆེ་བ་ལ་ནན་ཏན་དུ་མཛད། ལྷ་སར་ནུབ་ཅིག་བཞུགས་པ་ན་མནལ་ལམ་དུ་ཆོས་རྗེ་རང་བྱུང་རྡོ་རྗེས་སྐྱེ་བོ་འདུས་པ་དུ་མའི་དབུས་སུ་སེམས་བསྐྱེད་པ་སྩལ་ཞིང༌། མི་ཕམ་དཔལ་ལྡན་ཞེས་མིང་གནང་བ་དང༌། ཡང་ར་ཚག་ཇོ་མོའི་དྲུང་དུ་བཞུགས་པ་ནའང་སྐུ་དེ་ཉིད་ལྷན་ཅིག་སྐྱེས་མར་གྱུར་པའི་སྨིན་མཚམས་ནས་འོད་ཀྱི་རང་བཞིན་གཡུང་དྲུང་དམར་པོ་འཕྲོས། སྐུ་ལུས་ལ་ཕོག་པས་བདེ་བ་ཆེན་པོ་སྐྱེས་པ་བྱུང༌། གཡམ་བཟངས་པ་བསོད་ནམས་འོད་ལའང་ཁྲིད་ཁ་མང་ཞིག་གསན་ཅིང་སྐུ་མཚམས་དམ་པར་མཛད་ནས་བསྒོམས་པས། གནས་ནང་གི་སྒོམ་ཆེན་ཐམས་ཅད་ཀྱི་སྤྱོད་ལམ་མ་ལུས་པ་མངོན་སུམ་དུ་གཟིགས་ཏེ། སོ་སོར་ཚར་གཅོད་པ་དང་རྗེས་སུ་འཛིན་པའི་ཞལ་བརྡ་གནང་བས་ཐམས་ཅད་ཡ་མཚན་དུ་གྱུར། དེ་ནས་དགུང་ལོ་བཅོ་བརྒྱད་པ་བབ་པ་ལུག་གི་ལོ་ལ་མཁན་ཆེན་རིན་པོ་ཆེ་དོན་གྲུབ་དཔལ་བ་དང༌། སློབ་དཔོན་འཇམ་དབྱངས་ཆོས་ཀྱི་རྡོ་རྗེ། གསང་སྟོན་གཞོན་ནུ་དཔལ་བ་དགེ་འདུན་དང་བཅས་པའི་དབུས་སུ་བསྙེན་པར་རྫོགས་པའི་ནུབ་མོ་མནལ་ལམ་དུ་ནམ་མཁའ་ལ་ཉི་མའི་དཀྱིལ་འཁོར་བཞི་ཤར་བ་དང༌། རང་ཉིད་ཆོས་གོས་གསུམ་གྱིས་གཡོགས་ཏེ་ལྷ་མི་དུ་མ་ཆོས་ཀྱིས་ཚིམ་པར་བྱས་པའི་ལྟས་ཁྱད་པར་བ་བྱུང༌། བདེ་བ་ཅན་པ་སློབ་དཔོན་འཇམ་རིན་ལ་བྱམས་ཆོས་ལྔ་དང༌། ཚད་མ་རྣམ་ངེས། འདུལ་བ་མདོ་