[A:640]རྩ་རྣམས་གསན། ཆོས་རྗེ་རང་བྱུང་རྡོ་རྗེའི་ཞལ་སློབ་མཁན་ཆེན་ཀུན་དགའ་འོད་ཟེར་ལ་རྡོ་རྗེ་ཕྲེང་བའི་དབང་སོགས་དབང་བསྐུར་དུ་མ་གསན་ཞིང༌། བྱང་གི་འདམ་དང་སོག་ལས་བརྒྱུད་དེ་རེ་ཤོད་ཀྱི་བར་དུ་ཕེབས། རེ་རྒྱབ་དང་ཡོ་རྒྱང་གངས་སུ་ཆོས་རྗེ་བླ་མས་ཅོད་པཎ་བཅིང་བ་དང༌། ལུང་བསྟན་པ་གནང་བ་གཟིགས་ཤིང༌། ཡུལ་དེ་དག་ཏུ་འཁོད་པའི་སྐྱ་སེར་ཀུན་གྱིས་འབུལ་བ་མང་དུ་བྱུང་བ་བསྣམས་ཏེ། གནས་ནང་དུ་ཆོས་དང་མཐུན་པའི་ཁྲིམས་དང་དགེ་འདུན་གྱི་ཆ་རྐྱེན་དུ་གནང༌། རྗེ་རི་ཁྲོད་པ་བདེ་བར་གཤེགས་རྗེས་གྲྭ་པ་དམུ་རྒོད་རྣམས་ལ་ཐུགས་སྐྱོ་ནས་གདན་ས་བླ་མ་བསོད་ནམས་འབུམ་ལ་གཏད་ནས། གནས་ནང་གི་རྒྱབ་རི་སོགས། རི་ཁྲོད་ཁོ་ནར་བཞུགས། མཁན་ཆེན་འོད་ཟེར་རྒྱ་མཚོ་ལ་སྙིང་ཐིག་གི་སྐོར་ཆ་ལག་དང་བཅས་པ་གསན། སློབ་དཔོན་འོད་ཟེར་དཔལ་ལ་སྔ་འགྱུར་གྱི་རྒྱུད་འགྲེལ་དང༌། གཏེར་ཁ་གོང་འོག་གི་བཀའ་ལུང་ཕལ་ཆེ་བ་ཞུས་ཤིང༌། ཉིན་མཚན་དུ་གཡེལ་བ་མེད་པར་རྒྱུད་གཞུང་ལ་གཟིགས་རྟོག་དང༌། གཙོ་བོར་ཐུགས་དམ་ཏིང་ངེ་འཛིན་ཁོ་ན་ལ་མི་གཡེལ་བར་མཛད། དེ་ནས་དཔོན་སློབ་བཅུ་ཙམ་ཞིག་མཛད་ནས་དབུར་སྟོད་ནས་མྱང་པོ་ལ་ལམ་ཕྱུང་ནས་རྒྱ་མ་དར་ཕེབས་པ་ན། རྗེ་དུས་གསུམ་མཁྱེན་པས་ལུང་སྟོན་པ་གཟིགས་ཤིང་རིམ་གྱིས་ཀོང་པོའི་ཡུལ་ཁམས་ཐམས་ཅད་དུ་བྱོན། ཁྱད་པར་ཙ་རི་གསར་མ་བྱིན་ལེགས་སུ་ཡུན་རིང་དུ་བཞུགས་ཤིང༌། ཆོས་རྗེ་རོལ་པའི་རྡོ་རྗེའི་བཀའ་བཞིན་དུ་བ་ཡོ་རི་དབོན་དང་བཅས་པའི་བདག་རྐྱེན་ཀྱང་