[A:644]སུ་གཟུང༌། རི་ཁྲོད་ཁོ་ན་འགྲིམ་པ་ལ་གྲྭ་པ་མང་དུས་ལྔ་བརྒྱ་དྲུག་བརྒྱ་ཙམ་འོང་བ་བྱུང༌། དེའི་སློབ་མ་གཞན་དོན་སྐྱོང་བ་མང་དུ་བྱུང་བ་ལ། ཆོས་རྗེ་དྲི་མེད་པ་ནི། ལྗང་ནག་རྒྱལ་པོའི་བླ་མ་མཛད། ཕར་འུར་གྱིས་གཞན་དོན་སྐྱོང༌། སྲི་དཀར་སང་ཤེ་ནི། ཡུལ་སྤོམ་པོར་སྒང་བ། མཁའ་སྤྱོད་པ་ལ་རྩ་བའི་བླ་མར་གཟུང་ནས་སྤོམ་པོར་སྒང་དུ་ས་སེར་དགོན་པ་བཏབ་ནས་ཕྲིན་ལས་སྒྲུབ་པར་མཛད་དེ། དགེ་འདུན་སུམ་བརྒྱ་ཙམ་འདུས། དེ་རྣམས་ནི་འགེར་ཉག་གི་སློབ་མའོ། །བཀའ་བཞི་པ་རིན་ཆེན་དཔལ་གྱིས་ལྡན་སྒ་སྟོད་དུ་ཟུར་དགོན་བཏབ། རི་གླིང་གཉིས་སུ་ཡོད་པ་ལ་དགེ་འདུན་བཞི་བརྒྱ་ཙམ་འདུ། ལྷ་གཟིགས་པ་ནི། དང་པོ་འབྲི་ཁུང་པའི་གཟིམས་གཡོག་པ་ཡིན། དུས་ཕྱིས་མཁའ་སྤྱོད་པའི་ཞབས་ལ་གཏུགས། གདམས་པས་རྗེས་སུ་གཟུང་བས་ཐུགས་དམ་ཕུན་སུམ་ཚོགས་པར་གྱུར། གསུང་རྣམས་ལ་ཟིན་བྲིས་མཛད་པས་ཕན་པ་ཡང་ཆེ་བར་བྱུང༌། སྟོད་སྨད་ཐམས་ཅད་དུ་བྱོན་ཞིང་གཞན་དོན་རྒྱ་ཆེར་བསྐྱངས། དེའི་སློབ་མ་མཁན་ཆེན་ཤཱཀྱ་གྲགས་པ་ཡིན་ཏེ། དང་པོར་མཁའ་སྤྱོད་པ་ཉིད་ལའང་ཐུག་མོད་ཀྱང༌། གདམས་པའི་ཞིབ་ཚེགས་ཐམས་ཅད་ལྷ་གཟིགས་པ་ལ་བརྟེན་ནས་གསན། གཞན་ཡང་བླ་མ་དཔག་ཏུ་མེད་པ་བསྟེན་ནས་འགྲོ་དོན་ཡུན་རིང་དུ་བསྐྱངས་ནས། བརྒྱད་ཅུ་རྩ་གཉིས་ཤིང་ཕོ་ཁྱིའི་ལོ་ལ་གཤེགས། འཁྲུལ་ཞིག་བསོད་ནམས་འབུམ་ནི། གནས་ནང་དང་ཉེ་བའི་གཡུ་མ་ཞེས་པར་འཁྲུངས་ནས། མཁའ་སྤྱོད་པ་ལ་སོགས་པ་ལ་ཆོས་མང་དུ་གསན་ནས། གནང་ནང་གི་