[A:645]གདན་སར་བཞུགས། ཆོས་རྗེ་མཁའ་སྤྱོད་པའི་གསུང་ལ་ཟིན་བྲིས་སུ་མཛད་ནས་བསྙེན་སྒྲུབ་ཀྱི་ཁྲིད་ཡིག་ཆེན་མོ་ལ་སོགས་པ་མཛད། འདིའི་སློབ་མ་སློབ་དཔོན་བླ་མ་རྒྱལ་མཚན་པ་ལ་སོགས་པ་ཡིན་ནོ། །ཡང་བླ་མ་ཆོས་བཟངས་པ་ནི། འཁྲུངས་ཡུལ་ནགས་ཤོད་པ། མཁའ་སྤྱོད་པའི་ཞབས་ལ་གཏུགས་ནས་གདམས་པ་ཐམས་ཅད་ཞུས། སྟག་རྩེ་དང་བ་ཡོའི་གདན་ས་མཛད་ནས་ཕྲིན་ལས་རྒྱ་ཆེར་བསྐྱངས། བླ་མ་རིན་བཟངས་དཀར་པོ་ནི། འཁྲུངས་ཡུལ་ནགས་ཤོད་པ། དགོན་པ་གྲིབ་གདོང་བཏབ་ནས་ཚོགས་པའང་རྒྱ་ཙམ་འདུས་ཏེ། མཁའ་སྤྱོད་པའི་ཕྲིན་ལས་སྒྲུབ་པར་མཛད་ཅིང༌། ཕྱི་མ་གཉིས་པོ་འདིས་སྤྲུལ་སྐུ་ཆོས་དཔལ་ཡེ་ཤེས་ཀྱི་ཡང་བླ་མ་མཛད། ཆོས་རྗེ་རི་མི་འབབ་པ་ནི། ཆུ་ཕོ་སྟག་ལ་འཁྲུངས་ཏེ། མཁའ་སྤྱོད་པས་བཅུ་གསུམ་བཞེས་པའི་ལོའོ། །དགེ་ལྡན་པ་ལ་གཏུགས་ནས་རབ་ཏུ་བྱུང་བའི་ཀུན་ཏུ་སྤྱོད་པ་རྣམས་རྣམ་པར་དག་པར་མཛད། མཁའ་སྤྱོད་པ་ལ་གཏུགས་ནས་དུས་རྟག་ཏུ་ཕྱག་རྒྱ་ཆེན་པོ་ལ་མཉམ་པར་འཇོག་སྟེ། གོ་གཉིས་བཞེས་པ་ཆུ་མོ་བྱ་ལ་དྭགས་པོ་ལ་བར་དུ་གཤེགས། མཁའ་སྤྱོད་པའི་སྐུ་སྐྱེ་ཆོས་རྗེ་ཆོས་དཔལ་ཡེ་ཤེས་ནི། མཁའ་སྤྱོད་པའི་གསུང་ལས། ཕྱི་དུས་སྔགས་སྤྱོད་རྣལ་འབྱོར་ཀུན་ཏུ་རྒྱུ། །ཞེས་ལུང་བསྟན་པ་དང༌། གཤེགས་ཁར་སྐུ་སྐྱེ་འབྱུང་བར་ཞལ་གྱིས་བཞེས་པ་དང་མཐུན་པར། ཡུལ་མྱང་བོ། བྱེ་བྲག་ཁེ་བྲག་མདོར། ཡབ་བསམ་གྲུབ་དང་ཡུམ་བར་གཟའ་གཉིས་ཀྱི་སྲས་སུ་མེ་ཕོ་ཁྱིའི་ལོ་ལ་འཁྲུངས་ཏེ། ལྟ་