[A:647]དབོན་གྲགས་པ་ལ་རྒྱུད་བཅུ་བདུན་སྙིང་ཐིག་དང་བཅས་པ་དང༌། གཞན་ཡང་གསུང་ཆོས་མང་དུ་གསན། དེ་ནས་སྤོ་བོར་སྤྱན་དྲངས་ནས་ཡེ་གོང་ལ་སོགས་པར་བྱོན། དགུང་ལོ་བརྒྱད་བཞེས་པ་ལ་ཀོང་དབུས་ཀྱི་ས་མཚམས་བང་མདོར་ཆོས་རྗེ་དེ་བཞིན་གཤེགས་པ་དང་མཇལ་ནས་དགེ་བསྙེན་གྱི་སྡོམ་པ་བཞེས། བསྔགས་པའང་མང་དུ་གནང། དེ་ནས་སྟག་རྩེར་ཆོས་རྗེས་མཁན་པོ་གནང་། བློ་གྲོས་རྒྱན་མཚན་དཔལ་བཟང་པོས་སློབ་དཔོན་མཛད་ནས་རབ་ཏུ་བྱུང་། ཆོས་རྗེའི་དྲུང་དུ་ཁྲིད་དང་དབང་དང་ལུང་ལ་སོགས་པ་དཔག་ཏུ་མེད་པ་གསན། ཏའི་མིང་རྒྱལ་པོས་རྡོ་རྗེ་འཆང་གི་སྐུ། རྡོ་རྗེ་དྲིལ་བུ། གན་དཀར་སོགས་ཀྱི་གནང་སྦྱིན་ཀྱང་བྱུང༌། བཅུ་གསུམ་པ་ལ་སྙེ་བོར་བྱོན། དེ་ནས་ཀོང་པོའི་དགོན་གནས་རྣམས་ཀྱི་དར་རྒྱས་སྤེལ་ཞིང་བ་ཡོ་ལ་སོགས་པར་བཞུགས། ཙ་རི་བཀྲ་ཤིས་ལྗོངས་སུ་ཚེ་དཔག་མེད་ཀྱི་སྒྲུབ་པ་མཛད་པས་ཞལ་མངོན་སུམ་དུ་གཟིགས། དེ་ནས་ཡོས་ལོ་ལ་དྭགས་པོ་ནས་འོལ་ཁ་བཀྲ་ཤིས་ཐང་དུ་ཆོས་རྗེ་མཐོང་བ་དོན་ལྡན་དང་ལྷན་དུ་ཕེབས། མཚལ་མིན་རིན་པོ་ཆེ་བསོད་ནམས་བཟང་པོ་དོ་ལི་ལ་བྱོན་པ་དང་མཇལ། དེར་བསྙེན་པར་རྫོགས། སྣེའུ་གདོང་པ་དང་ཐེལ་བས་ཇ་འདྲེན་བཟང་པོ་མཛད་དེ་ཕྱིར་ཕེབས་ནས་དགོན་སར་རྒྱ་མཚོ་སྒང་དུ་བཀའ་བཞི་བ་རིགས་པའི་རལ་གྲི་ལ་རང་བྱུང་བའི་བཀའ་འབུམ། བྱམས་ཆོས་ལྔ། རྩ་ཤེ། རྩོད་བཟློག རིགས་པ་དྲུག་ཅུ་པ། སྟོང་ཉིད་བདུན་ཅུ་པ་ལ་སོགས་མང་དུ་གསན། གནས་གང་དང་གང་དུ་