[A:648]གདམས་པ་དང་མགུར་ལ་སོགས་པ་མང་དུ་གསུངས། དེ་ནས་ཆོས་རྗེ་མཐོང་བ་དོན་ལྡན་པའི་ཕྱགས་ཕྱིར་གླང་གི་ལོ་ལ་མྱང་པོ་ནས་བརྩམས་ཏེ། བྲག་གསུམ། འཇམ་ནེ། དམར་ཚ་ཐུང༌། རྔོད་ཨ་རིག་ཐང་རྣམས་སུ་ཕེབས། དེ་ནས་སྒོམ་སྡེ་དང་སོག་གི་བར་དུ་བྱོན། ནགས་ཤོད་དུ་མཁའ་སྤྱོད་པའི་སློབ་མ་དཀར་པོ་རིན་བཟངས་ཀྱིས་གདན་དྲངས་ནས་གྲིབ་གདོང་དང་སྦུད་མདར་ཆོས་མང་དུ་གསུངས། བླ་མ་རིན་བཟངས་པ་ལ་རི་ཆོས་སྐོར་ལ་སོགས་མང་དུ་གསན། དེ་བས་བྱང་ལམ་ལ་བརྒྱུད་དེ་འཚུར་ཕུར་ཕེབས། མང་སྐོལ་དང་འབུལ་འགྱེད་རྒྱ་ཆེན་པོ་མཛད། གནས་ནང་དུ་ཆོས་ཀྱང་གསུངས། བླ་མ་གངས་པ་དབང་ཕྱུག་རྒྱལ་མཚན་ལ་ནི་གུའི་ཆོས་སྐོར། འཚལ་བའི་ཆོས་སྐོར། དོ་ཧ་ལ་སོགས་པ་གསན། དེ་ནས་ལྷ་སར་ཕེབས་ནས་མཆོད་པ་དང་སྨོན་ལམ་རྒྱ་ཆེན་པོ་མཛད། དེ་ནས་དབུར་སྟོད་ནས་ལམ་བཏོད་དེ་མྱང་པོར་བརྒྱུད་ནས་ཀོང་པོར་ཕེབས། དགའ་མ་མོར་འཚུར་སྟོན་ཆོས་ཀྱི་རིན་ཆེན་ལ་མཁའ་འགྲོ་རྒྱ་མཚོའི་དབང་ལ་སོགས་དབང་མང་པོ་དང༌། ཟབ་མོ་ནང་དོན། བརྟག་གཉིས། ཀུན་སྤྱོད་རྣམས་ཀྱི་རྣམ་བཤད་ལ་སོགས་ཆོས་མང་དུ་གསན། དེ་ནས་ཡབ་ཡུམ་ལ་སོགས་པའི་དོན་དུ་སྦྱིན་གཏོང་རྒྱ་ཆེན་པོ་མཛད་པའི་ཕྱིར། སྟག་རྩེར་ཆོས་རྗེ་མཐོང་བ་དོན་ལྡན་སྤྱན་དྲངས་ནས་འབུལ་བ་རྒྱ་ཆེན་པོ་མཛད་ཅིང༌། ཚོགས་པ་ཐམས་ཅད་ཀྱང་འགྱེད་ལ་སོགས་པས་དགའ་བར་མཛད། དེའི་ཚེ་བླ་མ་ཡེ་ཤེས་དབང་པོ་མ་པའི་སར་མཛོ་ཡུ་ཆེན་པོ་ཅིག་ཆིབས་ནས་ཁོང་གི་བུག་སྒོ་ཆུང་