[A:655]ནག་ཁར་ཕེབས་པའི་ཚེ་དབུས་གཙང་གི་ས་ཕྱོགས་རྣམས་ནག་པོ་ར་རི་ཅིག་གིས་ཁེངས་འདུག་པ་ལ། ཇོ་བོ་མི་གཡོ་བའི་སྐུ་ཆུང་ངུ་ཞིག་གི་རལ་གྲིས་བཅད་པས། ཕྱོགས་ཐམས་ཅད་སྐྱ་སེང་སོང་བའི་སྣང་བ་བྱུང་གསུང༌། དགུང་ལོ་བཅུ་དགུ་བཞེས་པ་ལ་དབུས་སུ་ཕེབས། སྟོད་ལུངས་རྒྱ་དམར་གྱི་སར་རྟ་སྒ་ཕོག དབུ་ཚད་ཉན་པའི་ཞར་ཆོས་པ་དགེ་བཤེས་གཡོར་ཉན་ལ་ཞུས། དེ་དག་གི་སྐབས་སུ་བཀའ་གདམས་པའི་དགེ་བའི་བཤེས་གཉེན་ཡང་གང་བ་དང༌། དོན་སྟེངས་པ་དང༌། བྱ་ཡུལ་བ་ལ་སོགས་པ་ལ་སྨོན་འཇུག་གི་སེམས་བསྐྱེད་ཞུས་ཤིང་བསྟན་པའི་རིམ་པ་རྣམས་མཉན། རྒྱ་དམར་ལ་གསན་པ་མཛད་ཅིང་བཞུགས་པའི་ཚེ་དགེ་བཤེས་ཕྱྭ་བ་ལ་སྡིག་བསགས་པ་ལོ་བརྒྱད་དུ་འབྱང་མ་ཉན་གསུང༌། དགུང་ལོ་ཉི་ཤུ་རྩ་ལྔ་ལ་ཟུལ་ཕུར་བྱ་འདུལ་གྱིས་མཁན་པོ། རྒྱ་དམར་གྱིས་སློབ་དཔོན། ཨར་གྱིས་གསང་སྟོན་མཛད་ནས་བསྙེན་པར་རྫོགས། མཁན་པོ་ལ་འདུལ་བ་མདོ་རྩ་ལ་སོགས་མང་དུ་གསན། མྱང་བྲན་ལ་སྤྱོད་ཕྱོགས་མང་དུ་གསན། མཚན་ཉིད་ཀྱི་གྲྭ་སར་བཞུགས་པའི་ཚེ་ཡང་ཐུན་བཞིའི་རྣལ་འབྱོར་མ་ཆག་པར་མཛད། མཁྱེན་པ་ཆེ་བས་ཆོས་ཚ་བར་ཡང་གྲགས། རྨེན་དོར་བའི་འདུན་མ་ཡང་བསྡུས། དེ་ནས་བུ་ཧྲངས་ལོ་ཆུང་གི་དངོས་སློབ་དམར་ཆོས་ཀྱི་རྒྱལ་མཚན་ལ་བདེ་མཆོག་གི་རྒྱུད་ལ་སོགས་པའི་གསང་སྔགས་མང་དུ་གསན། དཔལ་ཆེན་རྒྭ་ལོ་དང་མཇལ་ནས་ཆོས་དང་གདམས་པ་མང་དུ་གསན། དེའི་ཆོས་ལྷག་རྣམས་བླ་མ་ཨ་སེང་ལ་གསན་པའི་ཚེ་བླ་མ་ལ་ཇ་སྐྱིས་པས་མ་བྱུང་བ་ལ་ཅུང་