[A:660]ཆོས་ཀྱི་རྣམ་གྲངས་མང་པོས་ཆ་ཆ་ནས་ཚིམ་པར་མཛད། དགེ་འདུན་གང་བཞུགས་པ་རྣམས་བཀའ་ལུང་གིས་བཅད་དེ་དམ་པའི་ཆོས་འདུལ་བའི་ཀུན་དུ་སྤྱོད་པ་ལས་མི་འདའ། གདམས་ངག་བཏབ་པ་རྣམས་ལ་ཐེབས་སླ་ཞིང་བསམ་གཏན་གྱི་སྒོ་མང་དུ་སྐྱེས་པས། དེ་ཉིད་དུ་མ་ཟད་ཕྱོགས་ཐམས་ཅད་དུ་སྙན་པའི་འུར་ཆེན་པོ་བྱུང༌། དེ་ཡང་རྗེ་སྒམ་པོ་བ་དེ་བཀའ་གདམས་དང༌། རྗེ་བཙུན་མི་ལ་གཉིས་ཀའི་ལུགས་འཛིན་པར་བཀའ་ཕྱག་ཆུ་བོ་གཉིས་འདྲེས་སུ་གྲགས་པ་བཞིན། མཚལ་སྒང་དུ་མཛད་པའི་གར་གྱི་ཉམས་དགུ་ཡང་དེ་དང་མཐུན། དེ་ནས་དེར་གྲོང་ཡུལ་དང་ཉེ་བ་ནི་མི་ལེགས་པས་དབེན་པ་ཞིག་ཐུགས་ལ་དགོངས་ནས། ནགས་ཁྲོད་དབེན་པ་སྟེས་དབང་གིས། །སྤྱོད་ཅིང་རག་དབང་བསྟེན་མཛད་གསོལ། །ཞེས་པའི་གསོལ་བ་ཡང་བཏབ། དེ་ནས་ནང་ཅིག་དགེ་འདུན་ལ་གྲོས་མེད་པར་གདན་ས་རིན་པོ་ཆེར་འབྱོན་པའི་ལམ་དུ་ཚ་རོང་བཙད་པོའི་སྒོ་དྲུང་དུ་བྱོན་ནས་དར་ཤམ་ཅིག་བསྐུར། ཁོ་བོ་མཚལ་སྒང་ན་སྡོད་པ་དེ་ལགས། ད་ཕག་མོ་གྲུའི་ཕུའི་ནགས་ཕ་གིར་སྡོད་སྙམ་པས་སྤྱན་རས་ཀྱིས་བཙའ་བར་ཞུ་བྱ་བའི་ལན་བསྐུར་བས། བཙད་པོའི་གསུང་གིས་ནང་དུ་ཚ་བ་ལ་བྱོན་ཟེར། ཁོ་བོ་ཐེམ་པ་མི་འགོང་བའི་དམ་བཅའ་ཡོད་པས་ཚ་བ་འདི་ཉིད་དུ་གནང་བར་ཞུ་བྱས་པས། ཁོང་རང་སྒོ་དྲུང་དུ་བྱོན་ནས་ཚ་བ་ཞུས། འཕྲོད་པའི་གཏམ་ཡང་མཛད། དེ་ནས་དྲེའུ་ཅིག་ཆིབས་ཡོད་པ་ཕག་མོ་གྲུའི་གྲོང་དང་ཉེ་བའི་ལུང་ནང་ནས་ཞུགས་ནས་བྱོན་པས། སྐུ་ཤིན་ཏུ་ལྕི་བས་དྲེའུ་དེ་ཡན་ལག་ཀ་བ་བཞིན་དུ་རེངས་ནས་འགྲོ་མ་ནུས། དེ་ནས་